2589/2024-2025

Dated Hnahthial, the 18th October, 2024: Vawiin khan State level pipe band intihsiakna neih zawh taka lawmman pakhatna dawngtu - Govt. Southern High School Boys Band hnenah lawmpuina, Bawrhsap, Pi Rita Lalnunmawii Pachuau chuan an school-ah a hlan a. Lawmpuina hun hi an school Headmaster, Pu HF. Lalmuanpuia chuan kaihruaiin Girls leh Boys Pipe band ten pipe band performance an entir nghal a ni.

Bawrhsap chuan Govt. Southern High School Boys band te henah lawmpuina thu sawiin Hnahthial District tihmingthatu leh chawimawitu an ni tiin an hlawhtlin nan a hma la a, theihthawp chhuah zawng zawngte chu fakawm a tih thu leh an chhuanawm tak zet thu a sawi a. Zirna hun chep tak karah Mizoram pum intihsiakna a pakhatna an ni thei chu DEO, zirtirtu te leh a bikin zirlaite inpumpekna rah liau liau anih thu sawiin hei hi Hnahthial district chu eng kawngah mah an hnufual bik loh zia tarlangtu chiang tak a ni a ti a.Pipe band a tel hi lehkhabu zirlai huang chin bak (extra-curricular activity) ni mah se zirna huang chhungah a tel vek thu leh hetiang thiltihna a tel hi thluak sawizawina tha tak, lehkha zirna kawngah pawh mi pui thei tu tha tak a nih thu a sawi a. Hemi anih rual hian an sikul kal chhan, an zirlai chu thlahthlam phah nan hmang lo tura a duh thu leh an hma hun, an career thlir reng chungin, rilru puitling tak pu theuh turin zirlaite chu a chah a ni.

Bawrhsap chuan lawmman chu an School Headmaster hnenah hlanin Boys Pipe Band te chuan an hmachhawp a la awm, Eastern Zone competition pawh an paltlang ngei a beisei thu sawiin National level thlenga lawmman an lak ngei theih nan duhsakna a hlan a ni.

He hunah hian Hnahthial District Education Officer(DEO) ni lai, Pu H.Sangthanga leh Hnahthial DEO chhuak ta, tuna Saitual DEO nihna chelh mek, Pu Micky Lalenkawla ten lawmpuina leh lawmthu sawina hun an hmang a. Zirlaite chu heng a an tel hi a lothlawn lo a ni tih sawiin an career tan, a bikin sipai lama luh an duh a nih pawhin kawng hawntu pawimawh tak a nih theih thu an sawi a ni.

Mizoram Samagra Shiksha buatsaih State Level School Band Competition-ah hian Mizoram chhung District hrang hrang atangin Pipe Band 12 an tel a. Kumin hi Aizawl District ni lo, District dang an tel tum khatna niin Aizawl District atanga tel thin Govt Mizo High School te chu kum hmasa lamah National Level-ah lawmman an lak avangin tun tumah hian an tel thei rih lo a ni. Mipa lama pahkhatna - Govt. Southern High School Hnahthial Boys Band leh hmeichhe lama pakhatna - Govt Saitual High School Girls Band-te chu Eastern Zone competition-ah Mizoram aiawhin an tel dawn a ni.

School Band Competition hi Ministry of Education-in Ministry of Defence-te nen thawk hovin kum tin an buatsaih thin a. State level leh Zonal level te chu Samagra Shiksha ten buatsaih thin in National level chu NCERT-in a buaipui thin a ni. Band competition hi chhawng thumin intihsiak thin a ni a. State level School Band competition neih hmasak ber thin niin chuta pakhatna theuhte chu Zonal level competition-ah an inel leh a, Zonal level-a tithate chu National level-ah an intihsiak leh ta thin a ni.

Zonal level-ah hian India ram state leh UT te hi zone li-ah an then a. Eastern zone, Western zone, Southern zone leh Northern zone ah te then niin Mizoram hi Eastern zone-ah kan awm a. Eastern zone-ah hian - Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura leh Sikkim te an awm a ni. Zonal level competition-a tithate chu National level New Delhi-ah an intihsiak leh ta thin a ni.