No.6703/2020-2021 

Hnahthial District Bawrhsap Pu Vanlalmawia hovin vawiin khan Superintendent of Police Pu Lalbiakkila leh Medical Officer Dr.R.Lalsanglura te chuan Tarpho leh Aithur khua tlawhin Zirna In leh Sorkar hmalakna hrang hrang an enfiah a, khawtlang hruaitute nen inkhawm hona hun an hmang nghal a ni.

Aithur khuaah hian Ni zung chakna hmanga an khaw chawmtu Tui pump-na tlawhin Ni zung chakna hmanga power 2.5 Megawatt siam chhuahna hmun tura ruahman VC ten ram an pek Tin 10 hmun te, Zirna In leh Health Sub Centre te an tlawh a ni. Tarpho-ah vek hian FCS &CA Department Godown sak tharna tur hmun an enfiah a ni.

Khawtlang hruaitute nen inkawm hona an neihah VC leh YMA hruaitu ten an khawtlang mamawh hrang hrang an thlen chu Hnahthial District Bawrhsap Pu Vanlalmawia chuan hmasawnna tur kawngah a tul ang zela hmalak a nih tur thu sawiin Sorkar-in khawtlang hmasawnna tura hna a thawh te chu tha tak leh neitu rilru pu a enkawl turin a chah a ni.

Hnahthial SP Pu Lalbiakkila chuan Krismas leh kumthar vuakvet lo thleng turah sorkar in a khap hrang hrang Halpuah leh thildangte chu khauh takin Hnahthial District ah kenkawh a nih dawn thu sawiin, khawtlang hruaitute chu an area theuhah khapna thupek ngai pawimawh turin a chah bakah Hnahthial District chhung khaw thenkhat chu Myanmar atanga ruihhlo tawlhna kawng pakhat a nih thu leh ruihhlo dona kawngah theihtawp chhuah tlang turin a sawm a, VDP la din lohna khuate pawh din theuh turin a ngen a ni. 

Hriselna kawnga mipuite hriattur tul pawimawh hrang hrang pawh Dr.R.Lalsanglura, MO Hnahthial chuan sawiin Health Care Scheme ah inziak lut theuh turin a chah a, "mitinin kan hmalam hun kan hre lova natna in min lo tlakbuak thut a nih pawhin thlaphang lo leh mangang lova kan awmna turin a hun lai hian inziahluh nachang i hre theuh ang u" a ti bawk.