No.3744/2021-2022 

Aizawl the 20th January, 2022 : Saang ram, Hnahthial a bawlhhlawh sawngbawlna hmun tur Solid Waste Management Centre siam mek chu nimin tlai khan District Bawrhsap Pu R.Lalremsanga chuan tlawhin hnathawktu (Contractor) te chu hmabak an la neihte tha leh fel fai taka thawk turin a chah a ni.

Hnahthial District bawrhsap Pu R.Lalremsanga chuan "Hnahthial chu District thar a nih angin hmasawnna hrang hrang a rawn lut mek a, ala rawn lut zel dawn bawk a,  heng hmasawnna hnathawh hrang hrangte hi a nihna tur anga tha leh hman a nih theihna turin mipuite hian kan dawnsawn thiam a tulin hnathawktute pawhin mipuite tana thawk an ni tih inhriain rinawm taka an thawh thin a ngai a ni" tiin Hnahthial-a Solid Waste Management Centre din tura hmalakna chak taka kalpui a ni chu lawmawm a tih thu a sawi bawk a ni.

Hnahthial-a bawlhhlawh sawngbawlna hmunpui tur siam hna hi UD&PA Deptt hnuaiah Rs.Nuai 60 sengin Vinco Construction Pvt Ltd, Edenthar Aizawl chuan an thawk a, June 2020 atanga thawk tanin, Tui dahna tur tanky 30,000 litres dawng, Site Office tur building - 13 ft. x 24 ft., internal road - 270 mtrs., Fencing - 270 mtrs. , Main Gate leh Segregation platform - 20 mtrs x 60 mtrs an siam a, tunkar chhung hian an thawh tur chin chu zawhfel an in beisei a ni.

Hnahthial District bawrhsap Pu R.Lalremsanga hi Pu Lalremruata Sailo,  DUDO chuan a tawiawm bawk a ni.

Attachment

  • Loading attachment...