No.941/2020-2021

Hnahthial District Bawrhsap Pu Vanlalmawia leh Superintendent of Police Pu Lalbiakkila te chuan vawiin khan South Chawngtui khua tlawhin Village Level Task Force hruaitute nen inkawmna hun an hmang a, New Ngharchhip leh Myanmar inkalpawhna ramri duty post an enfiah bawk.

South Chawngtui VCP Pu Lalthanliana kaihhruaia khawtlang hruaitute nen an inkawmho naah Hnahthial District Bawrhsap Pu Vanlalmawia chuan "District hi sorkar inrelbawlna kawnga hmun pawimawh luahtu a nih avangin Mipuite tana din sorkar chuan hneh taka mipuite a enkawl theihna turin District hrang hrang a siam a, Hnahthial pawh District thar niin tun din hmunah la changtlung vaklo mahila sorkarin a ngaihvenin bialtu MLA in a vei em em a engtik niah emaw chuan ala changtlung dawn tih hre reng ila chu hmasawnna lokal zel tur chu a chhawr tangkaitu ni tura kan inbuatsaih thar reng a tul a ni. Kan District chhunga hmun hmingthang leh pawimawhte pawh hi hmun danga mite hip khawpa kan enkawl uluk a, kan humhalh that hi a pawimawh a, chung zingah chuan kan District chhungah hian S.Chawngtui khuaa Purun Tlang kan nei te hi a lawmawmin kan humhalh that a pawimawh hle dawn a ni" tiin covid 19 do kawnga South Chawngtui khua hmalakna pawh lawmawm a tih thu a sawi a, Hnahthial District Bawrhsap chuan "he natna do hian eng chen nge hma kan la lak dawn tih a hriat lova sorkar ruahmanna te ngaichangin thuawih takin i zawm zel ang u" a ti bawk

Covid 19 do kawnga mipuite hriattur tul pawimawh hrang hrangte chu Hnahthial SP Pu Lalbiakkila leh District Hospital Hnahthial a Medical Officer Dr.R.Lalsanglura ten kalkhawm an hrilhfiah bawk a ni. 

District bawrhsap chuan Health Sub-Centre dinhmun te a hmunah enfiahin VLTF te hnenah tanpuina pawisa leh Silpouline a pe bawk a ni