No.940/2020-2021

Lunglei East bialtu MLA Pu Lawmawma Tochhawng Vice Chairman High Powered Committee, Lunglei District chuan vawiinah a bial chhung Leite leh Rotlang East tlawhin, he khaw pahnihten thal laia tui an mamawh an neih theihna tura HPC-in hma a laksak avanga tui an lak thlen tak chu a herh haw sak.

Pu Lawmawma Tochhawng hian Leite a VLTF te mamawh ei leh in turte leh hmai tuamna te a pe a, Rotlang East a NGO hrang hrangte hnenah hnenah thilpek a hlan bawk.

Heng khua a tlawh ah te hian Pu Lawmawma Tochhawng chuan khawvel pum tibuai mektu Covid-19 hripui beih let kawngah Chief Minister Pu Zoramthanga leh H&FW Minister Dr R. Lalthangliana leh ram hruaitu dangte kaihhruaiin Sawrkar chuan theihtawpa hma a lak zel thu sawiin Covid-19 avanga hun khirh tak kan tawn mek lai hian Mizo kan nih angin Zonun zemawi chhawm nun chhoh zel hun a ni a, Khawvel dang in an neih ve loh mi tlawmngai intel khawm Task force kan han nei te hi kan vannei takzet a, tha thlah lovin khawtlang tan, kan ram tan i ṭang ho zel ang u,a ti. 

Rotlang East khua ah hian sorkar hmalakna chi hrang hrang MLA hian a enkual a, khawtlangin Covid-19 dona kawnga an hmalaknate a en bawk. Rotlang E a chhungkaw engemaw zat ten ei leh bar a intodelh tumna rilru nena an hmalaknaah lawmthu a sawi a, a theihna kawng kawngah puih a tum thu a sawi.