1740/2023-2024

Hnahthial the 1st September 2023: Hnahthial District Bawrhsap pisapui building leh District Urban Development Officer (DUDO) pisa building thar te chu vawiin khan Health & Family Welfare Minister leh South Tuipui AC Bialtu MLA ni bawk Dr R Lalthangliana chuan DC Complex Rallangtlang-ah khuallian niin a hawng.

Khuallian Dr. R. Lalthangliana chuan kum 2019 atanga function tan District thar 3- Saitual, Khawzawl leh Hnahthial zinga Bawrhsap pisa hawng hmasa ber an ni thei chu a lawmpui thu a sawi a. Office building tha tak neiin staff la tlem hle mahse reiloteah luah khat vek turin tan an lak dawn thu a sawi a ni. Chutihrualin Minister chuan District in a ken tel department hrang hrang a officer leh staff te, office la nei ve lo te pawh thleng thiam tur leh siamrem thiam turin DC leh a thawhpuite a ngen bawk a ni. Minister Dr R Lathangliana chuan UD & PA hnuaia DUDO pawhin office building puitling an nei thei ta chu lawmawm ti hlein rahbi thar a nih thu a sawi a, Hnahthial khawpui tihchangtlunna kawngah an pawimawh hle tiin an department hnuaia hamthatnate hailuhna kawngah tan lakpui turin a ngen a ni. District a hlankai a nih tak hnua Hnahthiala hmasawnna hrang hrangte tarlangin Khuallian chuan hmachhawp tam tak a awm mek a ti a, District changtlung tak ni chho mekin hmabak la awmte tihhlawhtlinna kawngah mipuite sawmin thawhhona tha tak nen chuan district chhuanawm takah an siam thei dawn a ti bawk.

Vawiina office building thar hawnna inkhawmah hian Khuallian chuan hmasawnna ruhrel pawimawh tak tak an neih mek te leh tehfung hrang hranga Mizoram chetthatnate tarlangin District thar 3 a Hospital thuam that nan cheng nuai 1700 ruahman a nih thu te, tunhnaia NITI Aayog in Health Index a tihchhuahah Lunglei chu pakhatna an nih thu te, India ram puma Infant Mortality Rate (IMR) tehfunga Mizoram chu a tihthat thu te leh National Assessment & Accreditation Council (NAAC) tehfung ah Mizoram college-te chu an titha hle tih tarlangin thil chhuanawm tak a ni a ti bawk. Hnahthial district chhunga hmasawnna hrang hrangte pawh tarlangin CMO Office sak that te, Thingsai a Bazar hmunpui ‘Haat’ buatsaih a nih tur thu te, UD&PA, DHO, DAO, SAS, Animal Husbandry and Veterinary Hospital, DRDO, IPRO leh department dang tam tak dah a nih thu te tarlangin Hnahthial district in nasa takin hma a sawn mek a ni a ti. Power supply hnianghnar tha tak neih a nih theih nan 132 KVA buaipui mek pawh hman thuai a nih tur thu a sawi a, zirtirtute training na hmun tur District Institute of Education and Training (DIET) pawh ruahman a nih tur thu a sawi. Zirlai naupang rethei zawkten a thlawna lehkha an zirna hmun tur Kendriya Vidyalaya Sangathan (KVS) pawh Rawpui-ah din a ni dawn tih tarlangin zirna kawngah rahbi thar pawimawh tak a ni a ti bawk a, zin veivak mite leh chhim leh hmar inkalpawh tawnna a pawimawh tak Tuipui D lei dawh tura ruahman pawh thawh tan thuai a nih tur thu a sawi bawk. Mizoram mipuite run a, Mizo-te hmelma lian tak leh mi nunna tichhe nasa ber chu cancer a ni tiin Minister chuan JICA sum-a Super Specialty Hospital sak a ni dawn ta chu Mizoram mipuite tan malsawmna a thlen ngei a rin thu a sawi bawk a ni. Khuallian chuan kalkhawm mipuite bakah Mizoram mipuite chu rilru hrisel tak nen, thiltha duhna thinlung tak tak nen hmalam thlir theuh turin a sawm a, district tihpuitlinna kawngah Hnahthial mipuite chu an puihbawmna a ngen bawk a ni. Khuallian Dr R Lalthangliana, Bialtu MLA ni bawk chuan vawiin khan DC office complex -ah DC Office hawn hriatreng nan ‘Thing-Thiang’ a phun bawk a mi.

Vawiina DC Office leh DUDO office building thar hawnnaah hian Hnahthial Bawrhsap Pu Chuauhnuna chuan khuhhawnna thu sawiin Hnahthial District Bawrhsap Pisapui luah hmasa bertu nih chu lawmawm a tih thu a sawi a, Bialtu MLA chungah pawh lawmthu sawiin a bial a enkawlna kawngah leh sorkar hmalakna hrang hrangte uluk taka a vil thin avanga District thar pathum zinga DC Office buiding thar hawng hmasa ber an ni thei chu vannei an inti hle a. A kal lehzelna turah duhsakna a hlan nghal a ni. Hnahthial khawchhunga a thawhpui department hotu hrang hrangte chu District leh Mizoram tana theih tawp chhuah pui zel tura sawm nghalin Khawtlang hruaitu, VC member-te leh NGO hrang hrang, sub Hqrts YMA, MHIP, MUP leh Media hmanga District mipuite rawng bawlsak thin tu MJA member-te pawh Hnahthial District tan theih tawp chhuah pui zel turin a sawm bawk. Sawrkar hmalakna hrang hrang te chu a thawktute chauh a tihhlawhtlin theih a nih loh thu sawiin mipuite tawiawmna an mamawh hle tiin an thawhpuina leh puihbawmna a ngen nghal a ni.

Vawiin office building thar hawnna inkhawmah hian Rev TC Vanlalzuia, BCM Hnahthial North Bialtu chuan hunserh hmangin DUDO technical report chu Dr Andrew Vanlaldika, Director UD&PA in a pe a, thusawi tawi a nei bawk. Pi Malsawmdawngliani, Sr EE, PWD Lunglei chuan DC office building technical report pe bawkin Hnahthial Addl DC Pu Lalvenhima’n lawmthu sawiin hun tawp a khar a ni. Vawiin building thar hawnna inkhawm ah hian UD&PA Director Dr Andrew Vanlaldika ,DHME Director Dr Lalmalsawmi Sailo, DHME Addl Director Dr Ngurchamliana leh officials đang bakah Hnahthial khawchhunga Department hotu hrang hrang an tel a ni.

Vawiina hawn tak DC office building sakna sum hi Special Assistance to State for Capital Expenditure (SASCI) atanga hmuh niin August Ni 27, 2021 a sak tan a ni a, August ni 31, 2023 khan zawh fel a ni. Work order amount chu cheng 9,08,93,558/- niin total expenditure chu cheng vaibelchhe 10 man hu a ni. DC Building thar-ah hian Basement, ground floor, first floor leh second floor awmin total floor area chu 1967.86 sq m a ni. DUDO building hi SEDP sum atangin cheng nuai 70 senga sak a ni a, February ni 16, 2021 a sak tan niin June ni 22, 2023 khan zawh a ni. Ground floor, First floor leh Mumty awmin Pu Vanlalhuma chu contractor a ni.