595/2025-2026

Dated Hnahthial, the 27th May, 2025: Vawiin khan Hnahthial DC Conference Hall-ah Hnahthial District chhunga school naupangte hna zawnna kawnga pui theitu tur - "Programme on Career Awareness and Guidance Programme" chu DC office chuan buatsaihin Pu R. Vanlalruata, SDC chuan he programme hi a kaihruai a. Bawrhsap, Pi K. Vanlalruati chuan zirlaite hnenah fuihna thuchah sawiin career hrang hranga luh dan tur chu panelists - Pi Esther Leihang, MCS; Dr. R. Lalsanglura, MD; Pu Aaron Rosangzuala Ralte, RTP Holdings; Mastea Rinkson, Comedian/Content Creator; Pu K.Vanlalhruaia, KT Bakery leh Pu C. Ramengmawia (Ramboss), Content Creator/Producer te chuan zirlaite hnenah hrilhhriatna hun an hmang a ni.

Bawrhsap, Pi K. Vanlalruati chuan thu sawiin career kan tih hi miin a damchhunga eizawnna atan a hman, vantlang leh ama tan hmasawnna kawnga a hnathawh leh hmalakna a neihte chu a nih thu a sawi a. Career guidance kan tih hian hian sawrkar hna zawn dan inzirtirna a nih loh thu sawiin sawrkar hna ni lo, eizawnna tur tha tak tak a awm thu a sawi a. Sawrkar hna hmuh loh hi hlawhchhamna an nih loh thu sawiin kan thiamna leh kan theihna zawn theuhva taima taka hma kan lak chuan khawiah pawh eizawnna leh hlawhtlinna an awm thu a sawi a. Panelist-te hi sawrkar hna kher lo atang pawn hlawhtlinna leh eizawnna a awm a ni tih lantirtu chiang tak an nih thu sawiin career tha siam tur hian mahni aia pawimawh an awm loh thu a sawi bawk.

Bawrhsap chuan career thlanna kawnga pawimawh a tihte tarlangin - Nungchang leh mize mila hna zawn; Tuizawng hriat; Rilru puthmang dik leh midang a hre zawkte rawn hi a nih thu a sawi a. Chutih rual chuan kan tum ber lo ni thei lo pawh ni ila, Plan B neih a pawimawh thu sawiin thawhrimna, tumruhna leh teirei peihna neite tan chuan eng kawngah pawh hlawhtlinna a awm zel a ni a ti.

Career awareness and guidance programme hi chawhma leh chawhnu session-ah then niin chawhma hian Pi Esther Leihang, MCS; Pu Aaron Rosangzuala Ralte, RTP Holdings leh Mastea Rinkson, Comedian/Content Creator te chuan hun hmangin chawhnu session hian Dr. R. Lalsanglura, MD; Pu K.Vanlalhruaia, KT Bakery leh Pu C. Ramengmawia (Ramboss), Content Creator/Producer te chuan hun an hmang a. Anmahni zawn theuhva an eizawnna - civil service, doctor, entrepreneurship leh content creation lama luh dan tur, zirlaite hrilhhriatna hun an hmang a ni.

He programme hi Pu Zothanmawia Khiangte, Addl DC chuan lawmthu sawina in a khar a ni.