596/2025-2026

Aizawl, the 27th May 2025: Vawiin khan Aijal Club-ah Mizoram Remote Sensing Application Centre (MIRSAC)-in tunlai thiamna geospacial technology hmanga Mizoram chhunga leilet chhinchhiahna hman mek leh la hman theih tur (potential area) ri chhinchhiahna, map leh report an buatsaih chu Agriculture & Farmers Welfare Department hnenah hlan a ni a. Pu PC. Vanlalruata, Minister, Agriculture & Farmers Welfare Department chuan khuallian niin he hun hi a hmanpui a. Report bu hi a changtu Department leh a kaihhnawih dangte hman turin Er. H. Lalsawmliana, Member Secretary, MIRSAC chuan khuallian hnenah a hlan a ni.

Khuallian chuan hetianga MIRSAC-in vansang thiamna (space technology) hmanga Mizoram chhunga leilet kan neih te tangkai zawk a hman a nih theih nana zirchianna leh chhinchhiahna hman theih tur an buatsaih chu lawmawm a tih thu a sawi a. Mizopa technology, tuthlawh leh chempui ringa hun rei tak chhung mizote kan awm tawh hnua hetianga geospcacial technology hman tangkai a ni chu Mizoram tan hmasawnna lian tak a nih thu a sawi. He report bu leh a chhunga map te hi Sawrkarin ei leh bar intodelhna tura a hmalak mekah buh leh bal tam zawk thar chhuah kawngah a tangkai dawn hle a ni tiin Sawrkar department leh hemi lama hmalatu dangte chu a taka hmang tangkai turin a chah bawk a ni.

He inkhawm hi Pu Lalmalsawma Pachuau, Secretary, P&PI Department & Vice Chairman, MIRSAC chuan a kaihruai a. Pu Lalmalsawma Pachuau chuan North Eastern Council (NEC) sum hmang tangkai a, tunlai thiamna hmanga MIRSAC-in hun rei lote chhunga hetiang zirchianna an nei thei chu fakawm a tih thu a sawi. Pi Hmingthanpuii, Principal Scientist, MIRSAC chuan he report leh map te siam tura an zirchian dan tlangpui sawina hun a hmang a. He an hmalakna hi thlalem thlalak fiah zawk hmang leh a hmuna kala zirchian a nih bakah GIS thiamna hmanga leilet awm theihna hi tehfung hrang hrang hmanga zawnchhuah a nih thu a sawi. MIRSAC in an zirchiannaah chuan tun dinhmuna Mizorama Wet Rice Cultivation (WRC) zau zawng chu 7532.86 Hectare a ni. Pu Robert Lalchhanhima Sailo, Senior Scientist chuan kalkhawmte hnenah lawmthu sawina hun hmangin chawhma hun a khar a.

Chawhnu hun ah hian district hrang hrang atanga Agriculture Department leh a kaihhnawiha hmalatu kalkhawmte hnenah report leh map te hi a taka an hman tangkai dan tur a lem nena entirin, MIRSAC Scientist ten an zirtir leh bawk a ni.

He hunah hian MIRSAC, Planning & Programme Implementation Department, Agriculture & Farmers Welfare Department, Horticulture Department, Minor Irrigation Department, Rural Development Department, Public Health Engineering Department, Directorate of Geology & Mineral Resources, Sericulture Department, Urban Development & Poverty Alleviation Department, Land Revenue & Settlement Department, Disaster Management & Rehabilitation Department, Soil & Water Conservation Department, MISTIC, Directorate of Science & Technology atangtein mi pawimawh thahnem tak an tel a, Department aiawhin thu sawina hunte an nei bawk a ni.