No.6726/2020-2021

Hnahthial SDO (Civil) building atana sak zawh thar Rallang Tlang a mi chu vawiin atang khan Deputy Commissioner's Hnahthial Office atan luahluh tan niin Pathian hnena hlanna leh lawmthu sawina hun hman a ni.

Hemi puala inkhawm tawi neih hi Pu Lalremruata Sailo, SDO (Sadar) chuan kaihruaiin BCM Hnahthial South bialtu Pastor Rev.TC.Vanlalmalsawma chuan 'Rorelna dik chu luipui angin luang se' tih thu hmangin Pathian hnenah a hlan a ni.

Hnahthial District Bawrhsap Pu Vanlalmawia chuan Hnahthial District kalpui chhoh tan dan sawiin "kum 2008 ah District thar hawnna Notification chhuah niin nikum 2019 June-ah Function tura tih a ni a, August 2019 atangin a taka kalpui tan a ni" a ti. Sorkar inrelbawlna kawngah District chu Administrative Unit pawimawh tak a nih thu sawiin District chu a tet leh len lam ni lovin sorkar inrelbawlna ah hmun pawimawh a luah thu a sawi a, vawi khatah tih puitlin rup rup theih a nih loh thu leh District thangduang tak ni tura hmalak an tum thu a sawi bawk a ni. Hnahthial DC Office chu thawktute tan a nih a nih rualin "mipuite tan, mipuite vanga awm kan ni a, Citizen friendly takin kal kan tum a, thil tha leh kalphung tha hi a tuh ngheh theih a, midangte tanpui turin theihtawp kan chhuah dawn a ni" tiin District Bawrhsap Pu Vanlalmawia chuan Hnahthial District hmasawnna hrang hrang sawiin khawtlang hruaitute leh mipuite nena thawhhona tha tak an neihah lawmthu a sawi bakah DC's Office building pui ber tur pawh ruahman fel tep a nih thu a sawi bawk a ni. 

He hunah hian Industrial Development member Pu J.Lalchhuana Hnahthial chuan Hnahthial District a pian theihna tura hmalatu, Chatuan ram pan ta te hriatreng an nih thu leh mitthlaah an cham thu sawiin Sorkar-in District tih puitlin hna a kalpui leh District Bawrhsap hmalakna chak takah lawmthu a sawi a ni. Hnahthial District chhunga Official zawng zawngte chu neitu rilru pu a hnathawk zel tur leh mipuite pawhin an kaihza veng a, thawhpui thiam turin Pu J.Lalchhuana chuan a chah bawk a ni.  Heng bakah hian Hnahthial khawtlanga mi pawimawh tak tak te chuan Hnahthial DC leh a staff ten an mahni puala Office building an neithei chu an lawmpui thu leh Sorkar chungah lawmthu an sawi hlawm a ni 

Hnahthial DC Office luah luh thar hi Hnahthial District function hma kum 2018 atanga sak niin SDO (C) Office atan ruahman a ni a, Rs.Nuai 128 senga sak niin Floor hnih a ni.