No.6725/2020-2021

Aizawl 1st December, 2020: Chief Minister Pu Zoramthanga chuan Art & Culture Department in a buatsaih, khawhar hla 30 awmna 'Art & Culture Department Zaipawl Album Vol-I' chu vawiin khan I&PR Auditorium-ah a tlangzarh.

Chief Minister chuan Art and Culture Department in khawhar chhungte hnemtu leh anmahni lenpuituten an zaipui theih tur, khawhar hla album an buatsaih chu lawmawm a ti a. Tunlaiah COVID-19 hrileng avanga mipui punkhawm a remchan loh laia hnemtu tangkai tak a nih a beisei thu leh, hrileng a reh hnuah pawh tlaivar a zaite puitu tangkai tak a la nih zel a beisei thu a sawi. Pu Zoramthanga chuan COVID-19 hrileng chungchang sawiin, nunna chan kan awm thi chu pawi a tih thu a sawi a. COVID-19 hri leng mekah state dang leh ram dangte nen khaikhin chuan kan dinhmun a la ziaawm hle thu leh Pathian kaihhruaina ngei a nih thu a sawi a. Thiam ang tawka kan fimkhurna zui zel a pawimawh tiin, midang tana entawntlak a awm turin mipui a sawm a ni.

Chief Minister chuan hnam chawisang a, ram hmasawnna atan Art & Culture department chu Education department leh Information & Public Relations department nen an tan dun pawimawh tih thu a sawi a. Khawvel hnam lian leh langsar zawk te en chuan an hnam tawng an chawisang thiamin, zirna lamah a ni emaw, thuziak, drama, film leh thildang hrang hranga anmahni hnam tawng an hman avangin an culture leh hnam tawng chawilarna leh economy hmasawnna a kal kawp phah tlat thu a sawi a ni.

Vawiin album tlangzarhnaah hian Art & Culture Minister Pu R. Lalzirliana chuan lungngaite tawrhpuitu tur album changtlung tak department in a buatsaih chu lawmawm tiin, puitling tur a tha thawhtu zawng zawng chungah lawmthu a sawi a. Minister chuan Art & Culture Department chu Mizo nunphung, mite hriatreng theih nan a vawrhdarhtu an nih thu a sawi.

Minister Pu R. Lalzirliana chuan tunlai khawvel pumpui a boruak khirh tak kan tawn mek karah kan state pawhin hri laka him turin hma nasa takin a la, kan dinhmun pawh ziaawm viau a niin a lan thu a sawi a. Chutihrual chuan zirmi ten an chhut dan in heng kan hri vei piah lamah hian HIV/AIDS kai kan pung chak hle tia an sawi chu pawi a tih thu a sawi a. Heng hian nun uluk a pawimawh zia a lantir thu sawiin, eng hri pawh ni se, a laka kan inven theih thil a nih chuan mahni inthunun thiam a pawimawh a, thu awih hi harsa viau thin mahse thuawih hlawkna tel tu chu keimahni bawk kan ni, a ti a ni.

Vawiin album tlangzarh takah hian hla hrang hrang 30 awmin, hlawm thum - music track tel hla, khuang nen chauh a zai leh thalai lam hla a then a ni. Programme hi Pu R. Hmingthanzuala, Art & Culture Director chuan kaihhruaiin, Music Album Committee Chairman Pu Lalchuailova hnen atangin report ngaihthlak a ni a. Joint Director Pi Carol VLMS Dawngkimi chuan lawmthu sawiin hun a khar a ni.

Vawiin inkhawmah hian Chief Minister chuan Mizoram chu India Today in tehfung hrang hranga India ram state te a endiknaah Best performing small state in Inclusive Development and Most improved small state in Economy, Health and Entrepreneurship chu a dawn thu a puang bawk a ni.