2272/2023-2024

Hnahthial the 11th October 2023: Hnahthial District Election Officer, District Bawrhsap ni bawk Pu Chuauhnuna chuan vawiin khan kumina Mizoram Legislative Assembly inthlanpui neih tura inbuatsaihna kal zelah Hnahthial District chhunga Political party aiawhte, printing press neitute leh thuthar thehdarhtute chu election kaihhnawiha hriattur pawimawh hrang hrangte hrilhhriatna hun neiin a kawm.

DEO Pu Chuauhnuna chuan Election Commission of India (ECI) in inthlanpui neih hun tur a puan tawh thu tarlangin Mizoram ah pawh November ni 7, 2023 ah neih tur a nih thu a tarlang a, inthlan puan a nih rualin Model Code of Conduct (MCC) hman nghal a nih thu a sawi. Inthlanna thianghlim leh felfai neih a nih theih nan theihtawpa an in buahsaih thu tarlangin political party te, thuthar thehdarhtute leh printing press proprietor (neitute) thawhhopuiah a sawm nghal a ni. District Election Officer Pu Chuauhnuna chuan inthlanpui vuakveta candidate hrang hrang te sum hman theih zat bituk te tarlangin, an sum senso hmanna te thlithai (monitor) reng a ni a ti a, felfai taka che theuh turin political party aiawh kakhawmte a sawm bawk a ni.

Vawiin thutkhawmah hian Election kaihhnawih Nodal Officers hrang hrang atangin election chungchang hriattur pawimawh presentation thlirho a ni a, Hnahthial District huam chhung South Tuipui Assembly Constituency RO, Addl DC ni bawk Pu Lalvenhima chuan Model Code of Conduct chungchang zirtirna a pe a. ARO, SDC ni bawk Pi Betty Lalrinfeli’n Nomination chungchang presentation pein MCMC Member Secretary, Hnahthial District DIPRO Pi K. Ngosai chuan MCMC chungchang presentation a pe bawk a ni.

Tun tum inthlanpui neih turah hian South Tuipui Assembly Constituency-ah vote nei mi 16294, mipa 8037 leh hmeichhia 8257 an awm a ni. Service voters mi 87 te chhiar telin vote nei mi 16381 an awm a ni.