2539/2024-2025

Dated Hnahthial, the 16th October, 2024: Vawiin khan Hnahthial DC Conference Hall-ah Pi Esther Leihang, SDO Sadar kaihhruaiin Hnahthial District-a Quick Response Team (QRT) te tan First Aid leh Cardiopulmonary Resuscitation (CPR) training buatsaih a ni.

Training hi Dr. R. Lalsanglura, CMO, Hnahthial chuan Quick Response Team member kalkhawmte hnenah a pe a. Training nanah hian first aid inpek dan, a bikin thawchhawm leh lungphu chawl thut inenkawl dan - Cardiopulmonary Resuscitation (CPR) inzirtirna hun neih a ni a. CMO chuan CPR chu nunna hlu tak chhan theihna hmanrua pawimawh tak pakhat anih thu sawiin a bikin Hnahthialah tui tla an tam avangin a pawimawh lehzual thu a sawi a. Stroke, thaw chham, heart attack leh lung lam buaina tawk thut tanpui nan CPR hi a pawimawh hle a ni a ti bawk. Training-na ah hian mi puih dawn a tih tur leh tih loh tur te leh mi marphu leh thaw lak dan a dik em tih endik dan tur te inzirtirna neih a ni a. First Aid pek dawn reng rengin a theih ang chin chinah midang puitu tur zawn hmuh vat a pawimawh thu sawiin first aid a nihna angin mi puih lailawkna a ni tih hria a, first aid in a tih tur chin a tih chuan mithiam zawk, Doctor pan vat thin tura a duh thu a sawi a ni. Training tura kalkhawmte hian a taka tih chhinna, practical session he hunah hian an nei nghal a ni.

Pi Esther Leihang, SDO Sadar chuan QRT member kalkhawmte hnenah lawmthu sawiin engtik lai pawha koh theih tura din an nih angin inralring reng turin member-te chu a chah a. Rikrum thilthuah a thawkchhuah hmasa satliah ni lova midang pui thei tak tak tu ni turin training neih thin hi a pawimawh hle thu sawiin kalkhawm zawng zawngte chuan midang, an theih ang anga tam hnenah an training a an zirchhuah thiamna te chu zirtir chhawng zel turin a chah nghal bawk a ni.