4404/2024-2025

Dated Hnahthial, the 24th February, 2025: Ministry of Social Justice and Empowerment hmalakna hnuaia Ruihhlo Do Beihpui thlakna - Nasha Mukt Bharat Abhiyaan (NMBA) kal zelah Ruihhlo dona kawnga thawkchhuak tur leh midangte hnena zirtir chhawng turte zirtirna - 'One Day Training of the Trainers (TOT) programme on drug abuse prevention for Master Volunteers and Nodal Teachers' chu vawiin khan Hnahthial District tan Hnahthial DC Conference Hall-ah neih a ni a. He training-ah hian Hnahthial NMBA Chairman leh Bawrhsap ni bawk, Pi Rita Lalnunmawii Pachuau chuan fuihna thuchah sawiin training hi a hawng a ni.

Bawrhsap chuan Master Volunters tura kalkhawmte hnenah thu sawiin training tangkai taka hmang tura a duh thu leh an zirlai puite mai bakah rual u zawkte hnena ruihhlo that lohna zirtir thei tur khawpin zirtirna ngaithla turin a chah a. Kalkhawmte mai bakah Hnahthial mipuite chu ruihhlo lama kal lovin infiamna leh zirna lamah kal tam zawk tura chahin a pawimawh ber chu ruihhlo hi tih chhin loh tawp hi a ni a ti a. Mizo thalai naupang tak tak, ruihhlo vangin thlanmual lamah an liam nasa em em a, chuvang chuan nunna pawt tawitu leh kan nih tum ang min nih tir theilo tu, ruihhlo chu ti chhin ve ngai lo turin a chah a ni.

Ruihhlo kan tih hian drugs ringawt hi a kawh loh thu sawiin zu lakah pawh kan fihlim tel a tul thu a sawi a. Mizoram, kan ram neih chhun hi hnam dang kuta hlan kan duh loh chuan chhawr tlak, rin tlak leh thawk tlak kan nih a tul a ni tiin chumi tur chuan rilru fim leh taksa hrisel kan neih theihna laka min daltu, ruihhlo hi kalsan ngam turin Hnahthial mipui zawng zawngte chu a chah a. Lehkha zir mai ni lo, infiamna leh kut themthiamna hrang hrang hmangin eizawnna tam tak a awm tawh thu sawiin a eng hawi zawng pawha kal tur chuan a hmasa berah chuan kan laktlak a tul thu a sawi a. Chumi tur chuan a hmasa berah rilru leh taksa tichhetu, chhawr tlak lohva min siamtu, ruihhlo hi kan tih chhin miah loh hi a tul takzet a ni a ti.

Master Volunteers tur atan hian District tinah College zirlai chin, zirlai naupang sawmnga (50) thlan chhuah a zirtirna pek tur niin zirtirtu, Nodal Teachers sawm (10) thlan chhuah a zirtirna pek tur an ni bawk a. Vawiin training-ah hian Hnahthial District tana Master Volunteers tur High School leh Higher Secondary School zirlai sawmli (40) kalin Nodal Teachers tur pathum (3) an tel bawk a ni.

Training hi Mizoram Social Defence and Rehabilitation Board (MSDRB) technical staffs- Pi Vanlalhruaii leh Pu Lalrindika te'n an pe a ni.

He hunah hian Pi Esther Leihang, SDO (Sadar); Pu R. Vanlalruata, SDC leh Pu F. Lalrinfela, DIPRO te chu an tel bawk a ni.