4722/2024-2025

Dated Hnahthial, the 20th March, 2025: Vawiin khan Hnahthial DC Meeting Hall-ah DAMC Chairman leh Bawrhsap ni bawk, Pi K. Vanlalruati kaihhruaiin District Agricultural Marketing Committee (DAMC) member-te an thukhawm a. DAMC Member Secretary leh DAO ni bawk, Pi Julie Zodinpuii chuan Hnahthial DAMC hnuaiah tun thlengin Sawhthing quintal 1139.58 man pek chhuah a nih tawh thu a tarlang.

Member Secretary, Pi Julie Zodinpuii chuan Handholding Scheme hnuaiah Sawhthing chu February ni 20 atang khan hralh chhuah tan a nih tawh thu sawiin Sawhthing hralh tur ten an chhunkhawmna hmun, Secondary Collection Centre (SCC) panga - Darzo, Cherhlun, Chhipphir, Tarpho leh Hnahthial te a awm thu a sawi a. Tun dinhmunah hian heng Sawhthing chhunkhawmte khulhna tur hi Sawrkar hnen atanga sum an dawn milin thuang hnihin an pek chhuah tawh thu a tarlang a. Sawhthing hi kg ah cheng sawm nga (Rs 50/kg) a khulh a ni.

Thuang Khatna (1st Phase) ah hian SCC panga (5) te hnen atang hian Quintal 664 khulh tawh niin a khulh nan hian a vaiin cheng Nuai Sawmthum Pathum leh sing hnih (Rs. 33.2 lakhs) pek chhuah tawh a ni a. Thuang hnihna (2nd Phase) ah hian SCC panga (5) te hnen atang hian Quintal 475.58 khulh tawh niin a khulh nan hian cheng nuai sawmhnih pathum, sing sarih, sang sarih leh za kua ( Rs. 23,77,900) pek chhuah a ni tawh bawk a ni.

Sawhthing khulh nana pawisa pek chhuah tawh zat hi a vaiin cheng nuai sawmnga paruk, sing kua, sang sarih za kua (Rs 56,97,900) a ni a. Tun dinhmunah hian State Sawrkar atang hian SCC a Sawhthing khulhna tur sum hi cheng nuai za sawm nga (Rs. 1.5 crore) dawn tawh niin SCC a buk tawh si, pawisa la pek chhuah loh nena chhut chuan tun dinhmunah hian Sawhthing khulh nan cheng nuai sawm nga pakhat ( Rs. 51 lakhs) la mamawh belh a ni.

Sawhthing hralh chhuah leh hunah chuan Support Price kalphung pangngai anga kalpui tum a ni dawn a. He kalphungah chuan SCC chuan Sawhthing tender an chhuah ang a, chumi chhangtu chhan zat milin loneitute chu sawhthing cho tir an ni ang a. Sawhthing chhangtu ten an chhanna man kha kg a cheng 50 (Rs 50/kg ) a tlin chuan a tlin lohna kha sawrkar-in a tum ve thung tawh dawn a ni.

Tun dinhmunah hian Sawhthing hralh chhuah First Phase (20th February- 20th March 2025)-ah hian Hnahthial leh Cherhlun SCC-ah tender chhangtute awm tawhin an Sawhthing duh zat demand an pe tawh a. Anni hian kg ah cheng 20 (Rs. 20/kg) in an chhang a ni.

Thutkhawmnaah hian SCC tin viltu tur Coordinators pakhat theuh ruat ni se ti a rel a ni bawk.

Pu Zothanmawia Khiangte, Addl DC; Pi Esther Leihang, SDO Sadar; Pu Lalthakima, DHO; Pu George Lalnuntluanga, DFDO; Pu F. Lalrinfela, DIPRO; Pi Zosangliani Varte, SMS, KVK; Pu Lalsangzuala, RO; Pu Isak Lalremruata, Co-opted member, DAMC leh Dr. Malsawmdawngliana, Co-opted member, DAMC te chu thutkhawmnaah hian an tel a ni.