No.2750/2021-2022
Aizawl 27th October 2021: Hnahthial District leh Hnahthial khawpuia Covid-19 kai an tlakhniam theih loh avanga, District Bawrhsap Pu Lalremsanga hova District Hospital thawktute, Khawtlang hruaitu leh NGO hrang hrang hruaitute thukhawm chuan Hnahthial District-ah Covid-19 No Tolerance Week Naktuk October ni 28 zing dar 6:00 atanga November ni 4 tlai dar 6:00 thleng hman nise an ti a, a tul dan a zirin pawh sei theih a ni ang.
Hemi chungchangah hian District Bawrhsap Pu Lalremsanga chuan mipuite hnenah ngenna thuchah sawiin, kan hriat angin tun hnaiah Hnahthial khawpui leh District chhungah Covid-19 case a pung chho a, Test tawh zawng zawng 15666 zingah hri vei mi 926 an awm tawh a, mi 735 in dam takin enkawlna hmun an chhuahsan a, tunah hian active case 188 lam awm mek a, district population atanga chhut chuan active case hi a sang hle a, Hnahthial District Level Committee on Covid-19 thukhawm chuan Covid-19 case pung zel tur dan chah a nih theih nan No Tolerance Week October ni 28 zing dar 6 atanga November ni 4, zan dar 6:00 thleng hman a rel a, District Administration in week chhunga inkaihhruaina a siam te zawm theuh turin district mipuite kan in ngen tak zet a ni a ti.
No Tolerance Week chhunga mipuite zawm tur inkaihhruaina mumal tak siam niin a bawhchhiate chu dan anga hrem/pawisa chawi tir an ni ang. Hemi chungchangah vawiin khan Deputy Commissioner hian Order a ti chhuak a ni.
Nimin October ni 26, 2021 Thawhlehni khan Hnahthial District chhungah Positive 12 hmuh belh a ni a, District Hospital Hnahthial TrueNat Laboratory-a sample test 8 zingah 1; District chhung hmun hrang hrang a Rapid Antigen Test 82 zingah positive 11 hmuhchhuah an ni.
Attachment
- Loading attachment...
