No.2749/2021-2022
Aizawl, 27th October, 2021 : Health Minister Dr R. Lalthangliana chuan vawiin khan Zoram Medical College (ZMC)-ah Genome Sequencing Laboratory leh ZMC Director quarters a hawng.

Health Minister-in vawiina a hawn Genomic sequencing Laboratory hi PATH (Programme for Appropriate Technology in Health), Seattle, USA in an rawn donate a ni a, anni hian USD 52,000 (cheng nuai 38) he laboratory din nan hian an rawn hlan a, India hmarchhakah Genomic sequencing Laboratory hi Dibrugarh, Imphal leh Shilongahte a awm tawh a, ZMC-a mi hi a palina a ni. Laboratory hi Virus Research and Diagnostic Laboratory (VRDL) buildingah dah niin nanopore sequencer hmanraw pawimawh dangte a keng tel a ni. Genomic sequencing Laboratory-ah hian virus strain chi hrang hrang COVID leh COVID ni lote, drug resistant genes in bacteria te, cancer genomics, HLA typing etc., te hmuchhuah theih a nih bakah zirchianna a neih theih dawn bawk a ni.

ZMC Director quarters hi State sawrkar sum cheng vaibelchhe khat senga sak niin ground floor leh basement a awm a, bedroom 4, living room 2, choka a awm a, April ni 30, 2020 khan sak tan niin July ni 7, 2021 khan sak zawh a ni a. Zothan Consultancy Services ten a sak hna hi an thawk a ni.

Heng thil pahnih puala hawnna inkhawm ZMC Lecture Hall-I a neih ah hian Health Minister Dr R. Lalthangliana chuan PATH in khawl tha leh tangkai tak mai Mizoram tana an rawn pe chu lawmawm a tih thu sawiin COVID-19 hripuiin min nuai nasat lai taka kan nei hi a lawmawm lehzual a ni, a ti a. COVID-19 laka inven dan leh hri kaite enkawl dan hi danglam rih lo mahse variant hrang hrang a awm thar thin a, an genetic structure ah thil inthlak a lo awmin hri inkaichhawn a awlsam lehzual thei thin a, Genomic Sequencing laboratory hmang hian rang takin hrik tharte lo hmuhchhuah zung zung a nih chuan a inven kawngah pawh chet lak a awlsam theih phah a beiseiawm a ni, a ti a. COVID-19 virus bakah vector-borne disease leh superbugs antibiotic do tlat chite pawh a chhui chhuah zung zung theih a beiseiawm tawh a ni, a ti.

Health Minister chuan ZMC chu kum 3 leh thla 2 leka upa ni mahse nasa takin a thang tih a takin a hmuh theih a, sawrkar leh mi thahnemngaiten hmangaih taka min veipuina zarah hma kan sawn chak hle a ni a ti a. ZMC a zirlaite awmna tur boys & girls hostel zirlai 100 ve ve awm theihna tur chu kumin chhung ngei hian sak zawh fel beisei a ni a ti a, boys & girls hostel dang zirlai 100 ve ve awm theihna tur tho chu reiloteah sak tan a ni ang a ti bawk. Administrative building lian tha tak kumin chhung ngei hian sa zo turin theihtawp chhuah a ni, a ti a. Tun hnaiah ICU khum 10 hawn belh a nih bakah ICU khum dang 5 kan peihfel tep tawh a, SICU/PICU/NICU khum 20 awmna pawh kan peihfel tep tawh a ti bawk. ZMC ah Oxygen Plant 3 – 200 LPM, 300 LPM leh 1000 LPM tha takin a kaltluang tawh a, damlote mamawh oxygen tlakchham hlaujawmin kan awm lo a ti bawk a ni.

Health Minister chuan Chief Minister Pu Zoramthanga nen mobile RT-PCR laboratory kan neih theih nan nikum atang tawh theihtawp chhuahin hma kan la a, tun hnaiah kan dilnate tihhlawhtlin sak kan ni a, diltu hmarchhak State 4 zingah a dawng awm chhun kan ni a ti a, phai lamah an cheibawl mek a, November thla laihawl hi chuan kan hnen a rawn thlen kan beisei tawh a ni a ti bawk.

Health secretary Pu R. Lalramnghaka pawhin ZMC Director quarters leh Genomic sequencing laboratory hawn a ni ta chu lawmawm a tih thu sawiin, PATH organisation te chu hun lo la kal zel turah kawng chi hrang hranga an thawhho zel a beisei thu a sawi bawk a ni.

Dr Swagnik Roy, Associate Professor, department of Microbiology, ZMC chuan Genomic sequencing Laboratory chungchangah technical report pe in Dr Lalrinfela, Associate Professor (OBs & Gynae) & Estate Officer, ZMC chuan Director quarters chungchangah technical report a pe bawk a, Dr Shibu Vijayan, Global Technical Director, PATH leh Prof. N. Senthil Kumar, MZU ten thusawina hun an hmang bawk a, ZMC Director Dr John Zohmingthanga’n lawmthu sawina hun hmangin hnu a khar a ni.