No.2748/2021-2022

Aizawl Khuangchawi thla ni 27, 2021: Vawiin khan Lawngtlai District Level Child Protection Committee chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm.


Vawiin thut khawmah hian Member Secretary, Lawngtlai District Child Protection Officer Pi Mary Lalremruati'n District Child Protection Unit (DCPU) hma lakna report pein, meeting koh chhan leh thu ngaihtuah turte a sawi fiah a. Lawngtlai District chhunga naupang himna atana hma lakna dinhmun thlir ho niin, hmachhawp hrang hrangte sawi ho a ni.

He hunah hian kum 2019 April thla atanga kum 2021 October thla thlengin Lawngtlai District chhungah naupang chunga mipat hmeichhiatna lam hawia dan bawhchhiatna (POCSO case) 30 a awm thu tar lan niin, hei hi tun hma aia a san zawk avangin tan lak lehzual a tul tih a ni a. Zau zawk leh mipui huam kim zawkin inzirtirna lam kalpui chhunzawm zel ni se, tih a ni.

District chhung zirna in tinah a bika naupangte himna kawng ngaihtuahtu Nodal Officer ruat vek tawh niin, an hma lak dan tura rawtna hrang hrangte pawh he hunah hian sawi ho a ni a. DCPU enkawlna hnuaia child care institution, observation home leh adoption centre te mamawh hrang hrang bakah, District chhunga naupangte him nana hma lakna tura rawtna hrang hrangte sawi ho a ni bawk.

Lawngtlai DCPU enkawlna hnuaiah hian naupang enkawl leh venhim ngaite enkawlna (children home) pakhat - Lairam Motherless Home (LMH), naupang dan kalha awmte enkawlna (observation home) pakhat - Lawngtlai Observation Home (LOH) leh dan anga fa lak lam buaipuitu (adoption centre) pakhat - Lairam Child Adoption Centre (LCAC) a awm a. LMH-ah naupang 21, LOH-ah naupang 2 leh LCAC-ah naupang 1 an awm mek a. Tun thlengin chhungkhatte'n dan anga naupang fa atana an lak (relative adoption) hi 5 tihfel tawh a ni.

DCPU hnuaia committee hrang hrang zingah naupang enkawlna leh himna lam ngaihtuahtu - Child Welfare Committee (CWC) chuan kum 2012 atanga October, 2021 thlengin case 460 nei tawhin, case 450 chin fel tawh a ni a; naupang dan kalha awmte chung thu ngaihtuahtu - Juvenile Justice Board (JJB) chuan chuan kum 2012 atanga October, 2021 thlengin case 135 nei tawhin, case 132 an ching fel tawh thung a. Naupangte him nana hma lakna hrang hrang kalpui niin, Lawngtlai District chhunga police station 5 leh police outpost 2-ah te child friendly corner din vek a ni bawk.

Attachment

  • Loading attachment...