4156/2024-2025

Dated Hnahthial, the 10th February, 2025: Vawiin khan Hnahthial DC Office tual zawlah kangmei laka invenna hapta, Fire Prevention Week, 2025 hawnna hun hman a ni a. Hnahthial Addl DC, Pu Zothanmawia Khiangte chu khuallian niin Pu F Zosangliana, MJA President chuan he hun hi a kaihruai a ni. Fire Prevention Week hi February ni 10 atanga February ni 15 thleng hman tur a ni ang.

Khuallian, Pu Zothanmawia Khiangte chuan tun hnai hmun hrang hranga kangmei chhuak han thlir hian thil lang chiang deuh chu mihringte hian khuarel thil hi kan do hneh tak tak lo a ni a ti a. Kangmei a chhuah tak tak tawh hi chuan ram ropui tak takte pawh tih ngaihna awm lovin a kang hluah hluah thin a, chuvang tak chuan chumi a thlen loh nan kan tih theih tha ber chu kan theih ang tawka lo inven hi a ni a ti a. Khua a ro chhoh dawn avangin fimkhurna kan tlachham thiang lo a ni tiin ramngaw hi hal mai mai lo turin mitinte chu a chah a ni.

Lo hal dawn hunah mei lam sial that a pawimawh thu sawiin ram kalna reng rengah kan mei chhemte chu tha taka ti mit zel turin mipuite chu a chah a. In leh ram kang laka inven nan kan tu leh fate zirtirna tha kan pek a pawimawh takzet a ni tiin kalkhawm college zirlaite chu kangmei laka invenna dan thehdarh puiah a sawm a. Kangmei a chhuah hian hamhaih a chiai mai a awl thu sawiin kangmei lo chhuah palh pawha kan inpeih theih nan kan chetlak dan tur rilru lamah kan lo ruahman theuh a tul a ni a ti bawk.

Kumpuan leh hapta te kan hman hian a kum lehah kan hmanna chhan chu theihnghilh mai lovin kum tin vawn nun zel a tul a ni a ti a. Ramngaw tha tak kan neih hi state dang laka kan inchhuan theihna ropui tak a nih thu sawiin chumi chu humhalh a, ti chereu lova, kangmei chhuah lo turin mi tinte chu a sawm a ni.

Pu Lalsangzuala, Range Officer, Hnahthial Forest Range leh Pu H. Hmingthanzuala, President, YMA Sub Headquarters te hnen atangin kangmei laka kan inven a tulna leh kan inven theih dan tur te ngaihthlak a ni a. Rawmngaw leh kangmei chungchanga Hnahthial District dinhmun tawi ngaihthlak a ni bawk.

Hnahthial District Level Committee on Fire Prevention buatsaih - Fire Prevention Week, 2025 theme - "Kangmei ven hi kan tu leh fate hmakhua atan a ni" tih hmanga Reels siam inelna lawmman sem nghal a ni a. Lawmman dawngtute chu :-

1st Prize - Andrew Lalfakawma, Kanaan Veng 

2nd Prize - Lalrindika, Chanmari Veng

3rd Prize - C. Zirthanmawia, Electric Veng

He hun hi lawmthu sawina in Pu B Ramnunsanga, Principal, SAS chuan a khar a ni.

Hnahthial District chhunga Head of Office-te leh Government Hnahthial College zirlaite he hunah hian an tel a ni.