4157/2024-2025

Khawzawl, dated 10th February 2025: Vawiin chawhnu dar 1 khan Electric Veng YMA Hall-ah Khawzawl District Fire Prevention Committee bultumin Fire Prevention Week 2025 hawnna hun hman a ni a, Khawzawl DC Pu K. Vanlalthiana khuallian niin hun a hman pui. Tun kum thupui chu "Kangmei ven hi kan tu leh fate hmakhua atan a ni" tih a ni.

Khuallian Pu K. Vanlalthiana'n thu sawiin kangmei laka inveng him tur hian mahni fimkhur a tul thu a sawi a, electric hmanna reng rengah fimkhur turin mipuite a chah a, thuk hman pawn hman danah fimkhur turin a chah a ni. Kangmei ven kawngah chhungkuaah leh sikulah te inzirtir a pawimawh tih a sawi bawk a, a buaipui dan tur hrang hrang te pawh inzirtir a pawimawh em em a ni tih a sawi. Khawtlang rorultute leh office hotute fuihin kangmei tha zawk leh rang zawka beih dan tur ngaihtuah turin a chah a, mipui zawng zawng ram humhalhna thinlung neiin ram ti kang lo tur leh fimkhur tlat turin a chah bawk a ni.

He hun hi Honorary Wildlife Warden Pu P.C Rosiama'n a kaihruai a, Fire Prevention Week sawi hawnna hun a hmang bawk. Pu Hrangchungnunga, Range Officer, Lengteng Wildlife Sanctuary, Khawzawl Wildlife Division chuan report a pe a, Fire Prevention Week lo kalpui tawh thin dan te a sawi. Khawzawl SP Pu F. Lalbiakzauva'n thu sawiin he hun pawimawh tak hi mipuite kangmei laka inveng tha tura min kai harhtu a nih ngei a beisei thu a sawi a, fimkhurna tur hrang hrang te a sawi bawk. MHIP Pi Lalrinthangi'n lawmthu sawina hun hmangin a khar a ni. He hunah hian special item hrang hrang ngaihthlak a ni bawk.

MUP President Pu K. Lalzika pledge taking a kaihruai a, pledge chu hetiang hi a ni:

"Mizoram hi Siamtu Pathianin Mizote tana min pek a ni tih leh, he ram hi khawvela kan ram neih chhun a ni tih ka pawm a;

Mihringte leh thilsiam dang tinrengte hian inzawmna kan nei vek a, kan inkungkaihin kan in mamawh tawn vek a ni tih ka hre bawk a;

Ramkang hian thing leh mau, ramhmulte bak ah nungcha tam tak a tiboral a, tui in tur min petu ramngawte a tichhia a. Hei hian mihringte leh nungcha tinrengte tan harsatna hrang hrang min thlen a ni tih ka pawm bawk a;

Chuvangin, vawiin ni ațang hian India khua leh tui (Indian Citizen) ka nihna ang leh Mizoram neitu ka nihna angin kan ram thing leh mau leh nungcha chi hrang hrangte hi duat taka enkawl a, humhalh turin ka intiam a. Tin, ram tikang hauhlo tur leh midangte zirtirna kawngah pawh ka theih tawp ka chhuah ang tih ka in tiam e."

He hunah hian department hrang hrang hotu te, Khawzawl district a range officer te, tlawmngai pawl hrang hrang aiawh te leh college naupang te an tel a ni.