4158/2024-2025

Champhai, 10th February 2025: Vawiin khan District Level Fire Prevention Committee buatsaihin Conservator of Forest (Eastern Circle) Auditorium, Bethel Vengah Kangmei Ven Hapta 2025 hawnna inkhawm neih a ni a. Champhai Bawrhsap Pu VL Remliana chuan khuallian niin Kangmei Ven Hapta hi a hawng. Kumin Kangmei Ven Hapta thupuiah hian ‘Kangmei Ven hi kan tu leh kan fate hmakhua atan a ni’ tih hman a ni.

Khuallian Pu VL Remliana chuan he hunah hian ram kang tam zawk chu neitu thinlung put tawk lohna in a thlen ni a a hriat thu a sawi a. “Kan ram hi kan siamṭha dawn anih chuan midang kutah dah mai lovin, mahni ṭheuh kan pawimawh tih kan hriat thar ṭheuh a ṭul a ni,” a ti. District Level Fire Prevention Committee (DLFPC) Chairman ni bawk chuan Champhai District chhunga ram tikangtute lakah na taka hmalak an tum tih sawiin, DLFPC Member Secretary hmingin ram tikangtute lakah FIR thehluh zel a ni dawn tih a sawi.

Champhai Bawrhsap chuan thing leh mau, ramngaw leh nungcha te neitu kan nih angin neitu thinlung pu chunga kan enkawl a ṭul, a ti a. Ramngaw leh nungcha te humhalhna kawngah inchhungkhur aṭanga bul ṭan a tul a, kum naupang lamah inzirtirna nasa zawka kalpui a ṭul a ni, a ti bawk. Ramngaw leh nungchate humhalhna kawnga kan kal dan dik lo te siam ṭha a, theihtawp chhuah thar turin kalkhawmte chu a sawm a ni.

He hunah hian Pu Lalbiakchama Chawngthu, DFO chuan Mizoram ramngaw neih dan leh ram kang thlen dan report a pe a. Forest Survey of India in kum hnih dana report a tihchhuah ṭhin, state tin te ramngaw neih dan - State of Forest Report 2023 ah Mizoram pum leh Champhai District-a ramngaw awm zatin pun lam an pan tih a tarlang a. Hei hi Report tihchhuah aṭanga ramngaw awm zat a pun vawikhatna a ni, a ti. Mizoram sawrkar EF&CC Department-in a chhinchhiah danin kum 2024 chhung khan ram kang 3612 awmin, ram Hectare 3917.74 a zau a kang a. Heng zinga 116 chu ramngaw kang niin, hectare 94.5 a zau a kang a ni. A bak 3496 chu lo hal (jhum cultivation) kaihhnawih niin, hectare 3823.24 a zau a kang a ni. 

Kangmei Ven Hapta hawnna hi Pu Lalhlupuia, Hony. Wildlife Warden chuan a kaihruai a. Pu Lalventluanga, Asst Professor, Govt Champhai College chuan ‘Ram kangin a nghawng thil te’ tih hmangin presentation a pe a, Pi C. Vanlalruati, Secretary, Sub-Hqrs MHIP kaihhruaiin kalkhawmte hian kangmei ven Hapta thutiam an la a, Pu F. Lalrinmuana, Sub-Hqrs YMA President chuan lawmthu sawiin hun a khar a ni.