4159/2024-2025

Saitual, the 10th February, 2025: Vawiin chawhma dar 10:00 khan naupang kum 1 atanga 19 inkar ten rulhut an pai lohna tura rulhut hlo pek beihpui leh rulhutin a nghawng thalote inzirtirna hun, National Deworming Day (NDD), 2025 thawhkhatna chu Govt. Middle School-I, Saitual Venglaiah, Saitual Bawrhsap Dr. Lalngura Tlau chuan a hawng. 

He hunah hian Saitual Bawrhsap Dr. Lalngura Tlau chuan kalkhawmte hnenah lawmthu a sawi a, hmasawnna kawng hrang hrang buaipui chu thil pawimawh tak a nih rualin, mipuite leh naupangte hriselna ngaihtuah chu ngaih pawimawh hmasak a tul hle a ni, a ti.  Bawrhsap chuan natnate chu kai hnua inenkawl a that rualin, natna kai hmaa lo invenlawk a pawimawh tih a sawi a, Deworming programme pawh hi natna laka invenlawkna pawimawh tak a ni, a ti. Dr. Lalngura Tlau chuan Deworming Day programme hmannaah chuan Saitual District-a department hrang hrang te thawhhona tha tak hmuh theiha a awm chu lawmawm a tih thu a sawi a, hriselna kawngah tangruala theih tawp chhuah zel turin line department te a ngen nghal a. Zirlai naupangte pawh an thu ngaihthlak te chu hawn a, zawm theuh turin Bawrhsap chuan a chah nghal bawk a ni.   

Vawiinah hian Pu Micky R. Lalenkawla, DEO chuan powerpoint presentation hmangin National Deworming Day-in a a thil tum te, rulhlut pai ina nghawng tha lo a neih te leh rulhlut laka inven theih dan kawng hrang hrang te a tarlang a ni. NDD 2025 hawnna pual hian Sikul naupangte chu rulhut hlo (Albendazole) pek nghal an ni a, Saitual HWC atang kut sil dan inzirtirna neih a ni bawk.   

Vawiina NDD 2025 hawnna hun hi Dr. Lalremruata, Dy. CMO chuan a kai hruai a, thusawi hi khuallian, Dr. Lalngura Tlau, District Bawrhsap atanga ngaihthlak niin Pu Micky R. Lalenkawla, DEO chuan NDD chungchang zirtirna a pe a ni. He inkhawm hi Dr. Rosiamliani Bawitluang, DPM chuan lawmthu sawinain a khar a ni. He hunah hian Saitual Middle School-I zirlai naupangte leh Govt. William Booth Middle School zirlai naupangte bakah line department hotute an tel a ni. 

National Deworming Day (NDD), 2025 thawhkhatna hi vawiin February ni 10 atangin February ni 17 thleng neih tur a ni a. Hemi hun chhung hian District chhunga zirna in hrang hrangah rulhut hlo (Albendazole) a huhovin ei a ni dawn a, tumah hmaih an awm loh nan a thualnawnna (Mop Up Day) hi February ni 17, 2025-ah neih leh tur a ni. National Deworming Day thawhhnihna hi August thlaah neih leh tur a ni ang.