1540/2024-2025

Dated Hnahthial, the 12th August, 2024: Vawiin khan Hnahthial Bawrhsap, Pi Rita Lalnunmawii Pachuau kaihhruaiin, Govt. Hnahthial High School leh Higher Secondary School zirlaite nen Hnahthial District Volleyball Court-ah 'Har Ghar Tiranga' puala hun hman niin 'Nasha Mukt Bharat Abhiyaan' puala thutiam chhamna neih nghal a ni.

He hunah hian Bawrhsap chuan thu sawiin he hun, kan ram zalenna champha puala 'Har Ghar Tiranga' neih theih a ni chu a lawmawm in a hlut thu a sawi a. Zirlai naupang kal khawmte hnenah chuan mi ram awpbehna, midang thuhnuaia kan awm lo chu kan vanneihzia hre thar leh tur a a duh thu sawiin, hei vang tak hian kan zalenna ni puala kan hun hman chu a pawimawhna hriat thar lehzual a tul thu a sawi a. Hetih rual hian zalenna sualtu, kan ram tana pasaltha huaisente chu hre reng chungin anni zirlai naupang ho pawn an hnung zuia ram hmangaihna tak tak thinlung nei turin a duh thu a sawi a. Zirlaite hnenah chuan kan mi huaisen kal taten ram zalen min hnutchhiah hi a hlutna hre thar leh theuh chungin he zalenna hi a lothlawn leh tha lo zawnga hmang lo tura chahin, an mahni hma zawn theuh, a bik takin zirlai kawngah theih tawp chhuah theuh turin a fuih nghal bawk a ni.

Thu a sawi zawh hian 'Har Ghar Tiranga' puala thuchhamna chu neiin hemi rual hian ' Nasha Mukt Bharat Abhiyaan' puala ruihhlo ti lo tura intiamna thuchham chu neih nghal a ni a. Bawrhsap chuan hemi denchhen hian zirlaite hnenah kan ram drugs in a tihbuai nasat tawh thu sawiin zirlai naupang ho chu ruihtheih thil laka fihlim turin a chah nghal a. Drugs kan tih hian zuk leh huam tha lo chi tinreng a huam thu sawiin zirlai ho chu tun atangin hetiang lam reng rengah inhnamhnawih lo tura a duh thu a sawi a. Zirlaite chu taksa leh rilru hrisel leh thianghlim tak nena an than len theih nan he ni a thutiam chu tiam satliah lova mahni thinlung theuhva vawng tlat tura a duh thu a sawi bawk a ni.

He hunah hian Sub-Deputy Commissioner, Pu R. Vanlalruata, Govt. Hnahthial High School Headmaster leh Govt. Hnahthial Higher Secondary School Principal ten an tawiawm a ni.