1539/2024-2025

Siaha the 12th August 2024: Tukin zing dar 8 khan Har Ghar Tiranga Campaign hnuaiah Tiranga Yatra (Flag procession) chu District Bawrhsap Pu VL Hruaizela Khiangte kaihhruaiin Siaha-ah neih a ni.

Tiranga Yatra (Zalenna kawng zawh) hi DC Office tual zawl atanga tan niin Traffic Point, Siaha Bazar thleng neih a ni a, zirlai naupangte leh mipui thahnem tak ten zalenna sual chhuah nana nunna chan ta te hriat reng nan Hnam puanzar (National Flag) nen kawng hi an zawh a ni.

Traffic point-a Pledge taking (intiamkamna) neihah hian Pu VL Hruiazela Khiangte chuan India in zalenna a hmuh theih nana nunna chan ta te vang chauha zalenna nei kan ni tiin an inpekna ropui tak te, an mahni hriat reng nan leh zahna lantir nan he yatra (Kawng zawh) hi buatsaih a nih thu a sawi a, mipuite chu an flag ken theuh zah taka enkawl turin leh mahni inah a langsar lai bera tar theuh turin a chah. India ramin hma a sawn zel theih nan a bikin thalaite chu pen chhuak zel turin leh hnam hmangaihna (patriotism) rilru thar pu a, ram leh hnam tan rinawmna, chhelna nena ding tlat turin a chah.

Har Ghar Tiranga Campaign pual hian DC Office tual zawlah signature campaign neih nghal a ni a, kalkhawmten ‘Ram leh Hnam hmasawn nan nunna chan tawh te kan ngaisangin, kan ngaihlu che u a, kan Hero in ni’ tih inziak signature board ah ram tana nunna chante zahna entirnan hming an ziak bawk.

Tiranga Yatra hi Har Ghar Tiranga puala buatsaih niin India ram pumah August ni 11 atanga ni 13 inkarah ram mipuite inpumkhatna leh Hnam puanzar zahna lantir nan buatsaih a ni a, mipui thinlungah ram leh hnam hmangaihna tuh thar leha a awm theih nan leh zalenna sual chhuaktute hriat reng nana buatsaih a ni.

Har Ghar Tiranga Campaign chu Azadi Ka Amrit Mahotsav hnuaiah mahni in theuhah Hnam puanzar zar a, mipui rilru-ah Hnam puanzar ngaihhlutna a awm leh theih nana beihpui thlakna a ni a, mipuiten hnam rilru kan put a, ram leh hnam tan phur taka thahnemngaihna chawisan zel a nih theih nan August ni 13 atang ni 15 thleng mahni in theuhah Hnam puanzar zar theuh tura infuihna a ni. Mipuite chu #HarGharTiranga tiin thlalak leh selfie te social media platform hrang hrangah upload theuh tura sawm kan ni.

Har Ghar Tiranga Pledge-2024 (Mizo)

‘India Ram puanzar zar a, kan ram tana zalenna sualtute leh mi huaisente zah tak chungin, keimah ngei pawh hian India ram than nan leh hmasawnna hna thawk turin ka intiam e’