245/2025-2026

Dated Hnahthial, the 22nd April, 2025: MSACS leh Education Department tangkawpin a an buatsaih, sports hmanga High School leh Higher Secondary School zirlaite tana HIV/AIDS, sex him leh drugs hman sual chungchang inhrihhriatna - "Awareness Programme on Drug Abuse, Safe Sex, HIV/AIDS and STI awareness through sports amongst school going children" chu vawiin khan Hnahthial District Volleyball Association (HDVA) Playground-ah, Hnahthial District Education Officer (DEO), Pu H. Sangthanga chuan a hawng.

Hawnna hun hi Pu Chalnghaka, Headmaster, Govt. High School, Thiltlang chuan kaihruaiin Pu H.Sangthanga, DEO chuan thusawina hun hmangin sports hi a hawng a. DEO chuan sports ngawr ngawr hi an tum ber a nih loh thu leh sex hman fimkhur loh vanga natna awm thei chi hrang hrang chungchang inhrilhhriatna hun neih chu an tum ber a nih thu a sawi a. Sports thei tur chuan taksa hrisel neih a ngai a, taksa hrisel chuan rilru hrisel a ken tel thu sawiin mi rilru hrisel chu ruihhlo lakah an fihlim thin thu a sawi bawk. Sports chhung hian buaina siam lo tura zirlaite chu chahin thian tha tak tak siamna hun atana hmang theuh turin duhsakna a hlan a ni.

Thusawi zawh hian Pi TC Lalremruati, Boxer, Silver Medalist, National Level (Lightweight Category) chuan sikul tin aiawh zirlai naupangte chu ruihhlo hman khawlohna laka fihlim tura thutiam a chhampui a. Thu sawiin lehkhazir leh sports hi thil kalkawp thei a nih mai bakah sports-ah hian a tum tak tak tan chuan eizawnna tlak a awm thu a sawi a. Taksa sawizawi uar lehzual turin zirlaite chu a chah nghal a ni.

Sports hi ni li chhung awh tur niin category li - Mipa Football, Hmeichhe Volleyball, Hmeichhe Inkawibah leh Hmeichhia leh Mipa tan Inhruipawh (Tug of War) ah te inelna hi neih a ni dawn a. A ni lina, April ni 25 -ah kharna hun hman tur niin MLA, Pu Jeje Lalpekhlua chu khuallian a ni ang a, Youth Icon, 2024, top 5 - Tv J. Lalrosanga chuan zaiin kalkhawmte chu a awi ang.

Sports-ah hian Hnahthial District chhunga school hrang hrang sawmthum (30) an tel a. Vawiin leh naktuk zan hian zirlaite riahkhawmna hmun - Govt. Southern High School, Govt. High School leh Govt. Higher Secondary School-ah te Sub Hqrs YMA President leh MSACS hruaitute chuan HIV/AIDS leh STI laka him dan bakah drugs hman khawloh pawizia zirtirna hun an hmang ang.