No.1236/2020-2020

Covid 19 do kawnga hmalatu Hnahthial District Task Force leh VLTF hruaitute chu nimin khan District Bawrhsap leh DLTF Chairman ni bawk Pu Vanlalmawia kaihhruaiin a Office Conference Hall-ah an thukhawm a, inkharkhip thawh 3-na kalpui zawh taka an hmalakna te chu thlirkirin tha an tih thu an sawi bakah thawh 4-na kalpui leh meka hmalak zel dan tur an sawiho bawk

Meeting kaihruaitu Pu Vanlalmawia chuan "Covid 19 kan do-na ah hian fimkhur tur a ni a, tawngpawng hlauh lutuk erawh a tul lo. Tuna tangkhang lo hawng te hi thenkhat chuan lo hawng lo se an ti ringawt maite hi an ngaihtuah chian loh vang a ni. Kan unau state danga lehkha zir leh hnathawk te hian kawng hrang hrangah harsatna an tawh nasat bakah an hnathawhna hmunte an chawlh avangin thawh turte an nei tawh lova mangang takin an Inpui Mizoram an rawn pan a ni. Heng kan tu leh fate hi hlauhna nena lo en mai lovin thinhrikna kan neihloh a tulin a pawimawh hle a ni. Chutihrualin sorkar ruahmanna te zawmin fimkhur taka lo dawnsawn hi a thain a him tawk em em a, chutiang chuan pen chhuakin tanpui hna i thawk zel ang u" tiin kan tu leh fate tanpui ngamlo khawpa tlawm lo turin kalkhawmte a fuih a ni

Meeting chuan Hnahthiala hmun lunlai Bazar kawna dawr te chu inhawn chhawk turin kalpui nise hmundanga dawr te erawhchu nitin hawn rem tih sak nise an ti a. Bank dawr tu ten Social distancing an kalpui that theih nan Student Police Cadet leh NSS te duty chhunzawm zel se an ti.

Inkharkhip thawh 3-na kalpui chhung khan Hnahthial-ah Covid 19 dan bawhchhia mihring 240 atangin Rs. 24,200/- chawitir an nih thu Hnahthial SP Pu Lalbiakkila chuan sawiin heng zinga Rs.18,900/- Police te chawitir an nih thu leh a bak chu VLTF te chawitir an nih thu a sawi bawk. Zan dar 7 atanga zing dar 4 inkar chhung pawnchhuah khap kalpui mek chu mipui ten an zawm that thu leh bawhchhia man an la neih loh thu Hnahthial SP chuan a sawi bawk.

District Hospital Hnahthial a Medical Officer Dr.Lalrengpuii Ralte pawhin meetingah hian report pein Hnahthiala Quarantine Centre-ah state dang atanga rawn hawng mi 36 dah an nih tawh thu leh mi 13 chu him takin an chhuah tawh thu a sawi bakah tunah hian mi 23 te chu quarantine mek an la nih thu leh RAT hmanga an endikah pawh an Negative vek thu a sawi bawk a ni.