329/2025-2026

Dated Hnahthial, the 25th April, 2025: Vawiin khan Hnahthial District Volleyball Association (HDVA) playground-ah MSACS leh Education Department tangkawpin a an buatsaih, Sports Festival hmanga High School leh Higher secondary school zirlaite tana HIV/AIDS, sex him leh drugs hman sual chungchang inhrihhriatna - "Awareness Programme on Drug Abuse, Safe Sex, HIV/AIDS and STI awareness through sports amongst school going children" kharna hun hman a ni a. Pu Lalhmachhuana, Headmaster, Govt. High School, Hnahthial chuan hun hi kaihruaiin, Pu H. Sangthanga, District Education Officer chuan khuallian niin kalkhawm zirlaite hnenah thuchah a sawi a ni. 

Sports Festival kharnaah hian Chief Medical Officer leh District AIDS Control Officer ni bawk, Dr. R. Lalsanglura chu resource person niin zirlaite hnenah sex leh drugs hman khawloh hlauhawmna te a zirtir a. Thil tih ve chhin chakna leh thiante tih ang tih ve duhna hi ruihhlo leh sex hman khawloh chhan ber a nih thu sawiin zirlaite chu midangte'n eng ang pawn sawmin thlem mah se, ti ve chhin miah lo turin a chah a. Hnahthiala HIV vei za a sawmsarih pakhat (71%) zet chu kum 25 atanga kum 34 inkar an nih thu tarlangin a pawi hma, zirlai naupang nih lai atanga fimkhur tluk a awm loh thu a sawi a ni.

District Education Officer, Pu H. Sangthanga chuan thu sawiin tun tum sports chu Hnahthial District chhunga school 32 awm zingah 30 zet an rawn tel thu a tarlang a. Festival a nihna ang ngeiin hlim tak leh nuam takin an hmang ni a a hriat thu sawiin zirlaite pawh an nungchang a mawi tlang hle a ni a ti a. New Education Policy, 2020 chuan zirna inah sports leh insawizawina lam hawi uar tura a duh thu tarlangin zirna inah pawh infiamna lam chawisan zel a nih tur thu a sawi a. Sports lama titha, lawmman leh certificate dawng thinte chuan zirna in sang zawk leh tha zawkah te admission awlsam takin an hmuh theih thin thu sawiin infiamna kawngah pawh zirtirtute chu tan la zel turin ti a chah a ni.

Ruihhlo leh sex kaihhnawih natna hrang hrang hi Mizoram tuamtu, buaina lian tak a nih thu sawiin hemi do rem tur hian sawrkar leh NGO chauh tan chuan a harsat thu a sawi a. Ruihhlo leh sex avanga natna leh sualna thleng mek hi ti rem tur chuan tunlai thangtharte hi an pawimawh ber a ni a ti a. Mahni hma hun ngaihtuah chungin, insum theihna nen nun hmang zel turin kalkhawm zirlaite chu a chah a ni.

Sports Festival-ah hian inelna hi pangnga awmin chungte chu - 1) Mipa Football; 2) Hmeichhe Volleyball; 3) Hmeichhe Inhruipawh; 4)Mipa Inhruipawh leh 5) Hmeichhe Inkawibah te an ni a. Organising Secretary, Pu Nohro Chhuatlo chuan lawmman semna hun kaihruaiin inenla hrang hranga lawmman lak dan chu hetiang hi a ni :-

1) Mipa Football:-

Champion-Govt. High School, Pangzawl

1st Runner Up - South Vanlaiphai HSS

2nd Runner Up- Govt. High School, Muallianpui.

2) Hmeichhe Volleyball:

Champion-Govt. High School, Thingsai.

1 Runner Up-Govt. High School, South Vanlaiphai

2nd Runner Up-Govt. High School, Muallianpui.

3) Hmeichhe Inhruipawh:-

Champion-Govt. Higher Secondary School, Hnahthial.

1 Runner Up-Govt. Sawikunga High School, Darzo.

2nd Runner Up-Govt. High School, Hnahthial.

4) Mipa Inhruipawh:-

Champion-Govt. Higher Secondary School, Hnahthial.

1 Runner Up-Govt. High School, Hnahthial.

2nd Runner Up - Tuipui D High School.

5) Hmeichhe Inkawibah:-

Champion-RMSA Secondary School, Rotlang East

1 Runner Up-Govt. High School, Chhipphir.

 2nd Runner Up - Tarpho High School.

A vai belhkhawm (Overall) -in Govt. Higher Secondary School, Hnahthial chu Champion an ni a, Best Cheerleading School atan Govt Southern High School Hnahthial chu thlan an ni bawk.

He programme hi Pu S. Lalthanzuala, Sub Divisional Education Officer chuan lawmthu sawina in a khar a, J. Lalrosanga, Top 5, Youth Icon, 2024 chuan zaiin kalkhawmte chu a awi a ni.