1782/2025-2026

Dated Hnahthial, the 8th October, 2025: Vawiin khan Hnahthial DC Conference Hall-ah Right to Information (RTI) Week, 2025 pualin hun hman a ni a. Bawrhsap, Pi K. Vanlalruati chuan kalkhawmte hmaah thu sawiin Addl DC, Pu Zothanmawia Khiangte chuan programme hi a kaihruai a ni.

Bawrhsap chuan RTI Act chu ram inrelbawlna khalh ngil nana dan pawimawh tak mai a nih thu leh sawrkar inrelbawlna a mipuite an tel ve theih nana hmanraw tangkai tak a nih thu a sawi a. Hlemhletna leh eirukna do nana duan a nih thu sawiin mahni mimal hamthat nana hmang lo turin mipuite chu a ngen nghal a ni.

SPIO bakah sawrkar hnathawk kalkawmte chu RTI zawhnate tha taka chhang thin tura chahin chutih rual chuan mipuite chu official-te tihbuai nan ni lova, duan a nih chhan ang ngei, khawtlang leh mipuite tana thil tangkai zawh nan hmang thin turin a chah nawn leh a. Sawrkar inrelbawlna a kan zavaia kan tel ve theih nan RTI hmang tangkai theuh tur leh midangte pawh lo zirtir zel turin kalkhawmte chu a sawm nghal a ni.

RTI chungchanga hriattur pawimawh chu Resource Persons- Pu F. Lalrinfela, DIPRO leh Dr. Samuel R. Vanlalruata, Asst. Professor, GHC, RTI Master Trainer ni bawk hnen atanga ngaihthlak a ni a. RTI chungchanga zawhna leh chhanna hun neih nghal a ni.

"Observance of RTI Week, 2025" hi Pu HD Lalpekmawia, Project Director, DRDO chuan lawmthu sawiin a khar a ni.

He programme-ah hian Hnahthial District chhunga SPIO/SAPIO, sawrkar hnathawk, Village Council leh tlawmngai pawl hrang hrang hruaitute an tel a ni.