1783/2025-2026

Saitual, the 8th October, 2025: Vawiin chawhma khan DC Conference Hall, Saitual-ah Right to Information (RTI) week 2025 puala hun hman a ni a, Saitual Bawrhsap Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan thu a sawi a, RTI tobul leh din a nih chhan te a tarlang a, RTI chu lang tlang leh mawhphurhna la ngam sawrkar siam turin a pawimawh tih a sawi. Bawrhsap chuan he dan hi sawrkar hnathawh leh inrelbawl dan hriat chian zawk nana hmanraw tangkai tak a nih laiin midang khei nan leh tihhmingchhiat tum a, dik lo taka hman tum mipui zingah an awm thin chu pawi a tih thu a sawi bawk.

Bawrhsap chuan Sawrkar hnathawkte chu an department website-ah te mipuite hriat tur pawimawh te chu tarlang uar turin a chah a, hei hian RTI hmanga mipui zawhna awm thei tam tak a ti tlem dawn a ni, a ti. Dr. Lalngura Tlau chuan Department tina SAPIO, SPIO leh DAA te te chu an mawhphurhna hre nawn leh turin a chah a, RTI chu dan tha tak ni siin mi thenkhat hman dan dik tawk loh avangin harsatna a thleng thin tih sawiin, a tha zawnga hmasawn nana hmang thiam thei turin kalkhawmte chu a chah nghal bawk a ni.

Vawiin atana Resource Person Pi F. Zodingpuii, DIPRO chuan RTI Act 2005 chungchang sawi zauna hun a hmang a, RTI hman dan turte, a tangkainate, zualko (appeal) dan kawngte leh SAPIO, SPIO leh DAA te mawhphurhnate a tarlang a ni.

RTI week puala inkhawm hi Pu Lalthakima Chhangte, EO, in a kai hruai a, khuallian District bawrhsap Dr. Lalngura Tlau leh Resource Person Pi F. Zodingpuii, DIPRO te chuan thu an sawi a, kalkhawmte atang sawihona hun hman a ni bawk. Vawiin inkhawm hi Pi Christina Lalnunfeli, SDC chuan lawmthu sawinain a khar a, sawrkar department hotute, SPIO/SAPIO te, khawtlang hruaitute leh NGO hruaitute an tel a ni.