1784/2025-2026

Dated Aizawl, 8th October 2025: Vawiin khan Public Works Department Minister Pu Vanlalhlana chuan Mizoram hmar lam tlangdunga khawkar kawng hrang hrangte a tlawhkual a, kumin fur ruahtui tla nasain a tihchhiat Khawruhlian khaw hnuaia NH-02 kawng, thawmthat hna kal mek pawh a hmunah kalin a enfiah nghal.

Khawruhlian khaw bula NH-02 kawngpui hi kumin July thla leh September thla khan metre 50 vela zauin hmun hnihah, lirthei kaltlang theih lohin a tlabal a, PWD ten chak taka hmalain tunah hian temporary-in thawmthat hna thawk mek a ni a, lirthei pawh a tlantlang leh thei tawh a; Special Repair Estimate 2.65 Cr chu September 9 khan Ministry of Road Transport & Highways-ah thawnthlak a ni tawh bawk a ni.

Minister hian kumin October 21-23 a Sakawrdaia YMA General Conference neihna tur atana inbuatsaihna ni pahfawmin leh mipuite tan zin veivahna nuam leh him zawk a awm theih nan, Mizoram hmarlam tlangdung kawng hrang hrangte, Sakawrdai thlengin a tlawh leh bawk a; Mauchar, Serkhan leh Bagha inkar kawngte bakah Sihphir leh Durtlang inkar kawngte pawh a tlawh leh bawk dawn a ni.

Minister hi Er. H. Zoramliana, Engineer-in-Chief, PWD; Er. C. Lalthlamuani, Chief Engineer (Planning); Er. Robin Lalrinawma, Chief Engineer (Highways); Ar. Lalchhandami, Chief Architect; Er. Eddie C. Zothansanga, Superintending Engineer, NH Circle-I, PWD ten an tawiawm a ni.