1694/2026-2027

Dated Hnahthial, 7th August, 2026: Vawiin chawhma dar 11:00 khan Horeb Lodge Conference Hall-ah Hnahthial District Treasury Office bultumin Family Pension Surrender chungchanga hriattur pawimawh inhrilhhriatna - 'Sensitization Programme on Voluntary Surrender of Pension Payment Order' puala hun hman a ni a. Hnahthial Additional Deputy Commissioner, Pu Zothanmawia Khiangte chu he hunah hian khuallian niin Hnahthial District Treasury Officer, Pu H. Lalrinliana chuan hun a kaihruai a ni.

Khuallian, Pu Zothanmawia Khiangte chuan thu sawiin Mizote chu hnam rinawm kan intih rual hian eng thleng nge kan rinawm tih hi inzawh fo a tul thu a sawi a. Kohhran leh khawtlang tana pa rinawm tak, mahse sorkar thil a nih tak avanga dik lo taka sum leh pai hlep hreh miah lo tam tak an awm hi pawi a tih thu sawiin hetiang hi kan kalphung a nih zel chuan kan hma lam hun hi a thim hle dawn ni a a lan thu a sawi a. Chutih rual chuan insiamthatna hun kan la nei a ni tih erawh kan hriat a tul thu sawiin dikna leh rinawmna vawng nung zel thintute chu he ram hian a mamawh tak zet thu a sawi a ni.

Khuallian chuan Family Pension lak chungchangah sorkarin dikna a duh avangin he hun hmang hi kan nih thu sawiin chutih rual chuan zai dawh taka hma rawn la in, thla 3 chhung dik lo taka family pension la thinte tan in-surrender-na hun a rawn hawn hial thu a sawi a. He hun pek chhunga in-surrender lo te chu chhuichhuah an nih chuan an tan a mualphothlak in a pawi hle dawn a ni tiin dikna kawnga hmalaknaah sorkar hnathawkte, khawtlang hruaitute, NGO hruaitute leh mitin mai chu tanrual puiah a sawm nghal a. Rinawm tak leh dik taka thil tih chu kan himna leh hlimna tur a ni tih hre reng turin kalkhawmte chu a chah nghal bawk a ni.

Chawhnu lamah hian Pi Jennifer Vanrammawii, AA&AO chuan Voluntary Surrender of Pension Payment Order chungchang zirtirin Pu Lalhmangaihzuala, AAO(T) chuan lawmthu sawiin hun a khar a ni.

He hunah hian Hnahthial District chhunga Drawing and Disbursing Officer (DDO) te, khawtlang hruaitu VC te, NGO hruaitute, Kohhran hruaitute, MJA leh pensioner hruaitute bakah sorkar hnathawk sawm bik te an tel a ni.