1695/2026-2027

Serchhip, the 7^th August, 2026: Mizoram Handloom & Handicrafts Development Corporation Ltd. (ZOHANDCO) buatsaihin vawiin khan Thenzawl Auditorium-ah National Handloom Day vawi 12-na lawmna hun hman a ni a. He hun hi Minister Pu B. Lalchhanzova chuan khuallian niin a hmanpui .

Minister Pu B. Lalchhanzova chuan kum 1980 chho atang tawhin Thenzawl mipui eng emaw zatte’n eizawnna atan Puantah chu an lo hman tawh thu sawiin, Puantah hlutna tlahniam zel chu kum 2009-ah NABARD puihnain, Cod Nerc  leh Puantah Association tangrualin tharthawh leh a nih thu a sawi a. Puantaha eizawnna hi hi ngaihlua, a thanlen zel theih nana hma la zel turin khawtlang hruaitute pawh a chah a. Mipate pawhin hmeichhe hna chauha ngai lova tah ve turin a sawm bawk. Puantahtute chu Mizoram mai ni lo, ram dangah pawh tam zawka hralhchhuah a nih theih nan design- lamah tan la thar leh tur leh, quality tha lehzual, kuthnu faktlaka siam chhuah tum turin a a fuih bawk a; Mahni duhzawng ngawt ni loin, a leitute duhzawng te leh hnam dangte lawmzawng tura tih dan thar ‘Innovative’ zawkte  ngaihtuah turin a fuih bawk. Designing lama training-te pawh uar lehzuala neih a nih theih nan ZOHANDCO te nen tangtlanga hma la thar zel turin a fuih bawk a ni. 

ZOHANDCO Managing Director Pu L.P. Lalchangkima pawhin thu sawiin, kum 2019 Census-ah Mizoramah puantahtu 30,000 vel awm kha tunah chuan 40,000 chuang an tling tawh tih a sawi a. ZOHANDCO hmalakna hrang hrangte sawiin vawiin hian New Delhi Safdarjung-ah Mizo thil siam bik zawrhna dawr thar (750 sq. feet) chu Chief Minister-in a hawn dawn thu leh, Kolkata leh Bangalore-ahte pawh hma lak mek niin, Bangalore-ah phei chuan December thla hian pisa building peih a nih tawh tur thu a sawi a. Thenzawl ZOHANDCO pisa sak mekah T-Shirt puan tahna khawl dah tum a nih thu te, Mizoram hmun hrang hranga Common Facility Centre din tura proposal siam mek a nih thute sawiin, MISTIC, Science & Technology te nen ṭangkawpin hnam ro thil hlute a neitu  nih chhinchhiahna G.I. Tag leh Patent te an buaipui mek thu a sawi bawk . Pu Vanlalmalsawma Sailo, ZOHANDCO chuan lawmthu sawiin hun hi a khar a ni. 

National Handloom Day pual hian Handloom Exhibition buatsaih niin chawhnu lamah Traditional Handloom, Trademark, Patent leh Geographical Indication (G.I) chungchanga inzirtirna Pu Rodingluaia, Assistant Manager, ZOHANDCO hoin neih a ni bawk.

Minister hi MIFCO Chairman Pu Lalthazual Royte-in a tawiawm bakah Thenzawl SDO (Civil) Pu K. Lalhlimpuia leh Serchhip atangin DIPRO leh MJA hruaituten an tawiawm a ni.

National handloom Day hi August ni 7, 1905-a, mahni ram thil siam ngaihlu tura hmalakna Swadeshi Movement din tan ni hriatrengna ni atan Ministry of Textiles chuan kum 2015 khan a puang a ni.