3002/2024-2025
Dated Hnahthial, the 14th November, 2024: Vawiin khan Hnahthial District chhungah Mizoram District dang rualin National Disaster Management Authority (NDMA), State Disaster Management Authority (SDMA) leh District Disaster Management Authority (DDMA) tangrualin a an buatsaih - State level Mock Exercise on Floods and Landslides chu neih a ni a. Zing dar 10 atangin Mock Exercise hi neih tan niin Incident Commander, Addl DC. Pu Zothanmawia Khiangte chuan a kaihruai a ni.
Leimin thlen thulha chetlak dan tur nun chan zirna, Mock Exercise hi hmun hnih - Site 1: HDFA turf ground bul leh Site 2 : NH-54 to Nauhruaikawn inkar, Chala thlan bulah te neih niin heng site pahnihah te hian hliam tuar lem chang (victims) pali ve ve, DRDO staff, Chanmari YMA Branch leh BDO staff lam atangin an awm a. Heng site pahnih a victims pali theuh te hi triage color coding (hliam tuar nat dan azira rawng pek) pakhat theuh pek niin an ban rekah an hliam tuar dan milin ribbon hren tir zel an ni a. Site pahnihah hian Rawng dum - Mitthi, Rawng sen - Hliam na tak tuar, Rawng eng - Hliam satliah leh Rawng hring - Hliam tuar na vak lem lo lem chang pakhat theuh an awm a. Heng bakah hian hliam tuar ve lem lo, chhiatna in a nghawng, relief package dawng tur lem changte an awm bawk a ni.
Nun chan zirna, Mock Exercise hi zing dar 10-ah DC office atangin neih tan a niin DC office chu control room-ah hman nghal a ni a. Leimin thlen report DC office-ah dawn niin Incident Commander chuan Police, Hospital leh a tul tul te be kualin DC office siren tihrik nghal a ni a. Chhiatna thlenna hmunah Police, Ambulance leh a tul tul te chu tirh chhuah nghal niin Quick Response Team (QRT) member ten hliam tuar zawn chhuah hna an thawk nghal a. Hliam tuar leh mitthi lem chang zawn chhuahte chu an hliam tuar mil zelin ribbon hren tir an nih hnuah District Hospital panpui nghal an ni a. Hospital-ah hian team dah te chuan an hliam tuar dan milin a lo buaipui nghal zel a ni.
Mock Exercise neih zawh anih hnu hian District zawng zawng huapin online-in Debriefing meeting neih a ni a. District hrang hrang atangin he hunah hian mock Exercise an kalpui dan review report tawi ngaihthlak a ni a. Hnahthial District aiawhin Head Observer, Pi Esther Leihang chuan he meeting-ah hian report pein Mock Exercise kalpui dan chuan duhthu a sam thu leh mock exercise-na a tel zawng zawngte chuan an chanpual an hlen that thu a sawi a. Hemi anih rual hian Hnahthial District-a NDRF(National Disaster Response Force) leh SDRF (State Disaster Response Team) awm lo te, District Emergency Operation Centre (DEOC) bakah dedicated Fire response team awm lo te chu thil ngaihtuah ngai anih thu a sawi a ni.
He mock exercise-ah hian District Disaster Management Authority (DDMA) a department hrang hrang - P&E, DCSO, PHE, PWD leh CMO te chu an tel a. A site-ah hian Pu R. Vanlalruata, SDC kaihhruaiin Site 1 leh Site 2 Observers - Govt. Hnahthial College Assistant Professor pahnih, Dr. Samuel R. Vanlalruata leh Pu CS Vanlalkunga te bakah Site 1 Incident commander, SI, Pu Lalnuntluanga leh Site 2 Incident commander, SI, Pu Lalsangpuia te chu an tel bawk a ni.
