2310/2024-2025

Dated Hnahthial, the 1st October, 2024: Tukin zing dar 6:30 khan Hnahthial District-ah faina beihpui thlakna- 'Swachhata Hi Seva' campaign pualin faina kawng zawh - 'Cleanliness Rally/Prabhat Pheri' chu Education Department bultumin Hnahthial Town huam chhunga High School leh Higher Secondary School zirlaite nen neih a ni.

He hun kaihruaitu, Sub- Divisional Education Officer (SDEO) Pu S.Lalthanzuala chuan thu sawiin he hun hman anih chhan chu sawrkar laipuiin faina a ngaih pawimawh vang leh India ram chu ram fai leh thianghlima chhuah a tum vang a nih thu a sawi a. He beihpui thupui - 'Swabhav Swachhata - Sanskaar Swachhata' awmzia ber chu nitin hun hmanna a faina nunpui anih thu sawiin he hun hman chhan anih ang ngei hian kalkhawm zirlai naupang zawng zawngte chu an nun theuhvah faina beh tel tir turin a chah a. Ram fai tur chuan mimal tin an pawimawh thu sawiin kan chhehvel, kan environment hi kan ta a ni tih mahni rilruah dah len a pawimawh thu a sawi bawk. Kan ram ngaw, kan chhehvel engkim hi neitu chan changa kan enkawl a tul tih sawiin chumi avang tak chuan hnawmhnawk hi tladah deuhva paih mai mai lo turin leh a tha thei ang bera kan ta a nih ang ngeia enkawl turin zirlai kalkhawmte chu a sawm a ni. Kan environment tichhetu leh ti thianghlimlo tu lian tak pakhat chu bawlhlawh tawih thei lo (dry waste) chu a nih thu sawiin he hun hman atang hian bawlhlawh chu a awmna tur tak, bawlhlawh bawmah paih zel turin zirlaite chu a chah a. Faina thupui chu mahni in theuhvah hawn turin zirlaite chu a chah nghal bawk a ni. Thu a sawi zawh hian SDEO chuan zirlaite chu faina thuthiam (Cleanliness Pledge) a lak tir nghal a ni.

Faina kawng zawh - 'Cleanliness Rally/Prabhat Pheri' hi Electric Veng Community Hall atanga neih tan niin Govt. High School Hnahthial thleng faina kawng zawh hi neih a ni a. DIPRO, Pu F. Lalrinfela hnen atang he hun kharna thusawi ngaihthlak niin fai chu taksa mai ni lovin rilru hrisel nan pawh a pawimawh thu a sawi a. Nun siamthat nan faina a bul tan a tul thu sawiin zirlaite chu an nitin nuna faina beh tir tlat turin a chah a ni.

School naupang bakah zirtirtute leh District Education Office lam atanga hna thawktute he hunah hian an tel a ni.