1983/2026-2027 

Dated Hnahthial, the 28^th August, 2026: Vawiin khan DC Meeting Hall, Hnahthialah Bawrhsap, Pi K. Vanlalruati kaihhruaiin The Mizoram State School Drug Policy, 2026 (Draft) chungchangah District Level Consultation thutkhawmna neih a ni a. District Education Officer, Pu Micky R. Lalenkawla chuan thutkhawmna neih a nih chhan sawiin zirlaite ruihhlo laka an lo fihlim theih nana duan mek policy chuangchang en ho va, policy changtlung tak kan neih theih nana kan thil hriat leh tul kan tih ang te rel ho a nih thu a sawi.

DEO chuan The Mizoram State School Drug Policy, 2026 (Draft) chungchang sawi zauna neiin zirlaite ruihhlo laka an lo fihlim a, nunphung leh rilru hrisel tak an neih theihna tur atana duan a nih thu a sawi a, policy duan mek chhunga pawimawh zual ni a hriatte chu sawi ho a ni. Thutkhawmnaah hian Moral Education chu ngaih pawimawh niin Mizo tawng ngeiin zirlai bu hran siam a, subject hran anga zirtir thin ni se ti a rawtna siam a ni a. Life skill develop-na turin middle school leh high school-ah te Work Education introduce leh ni se ti a rawtna siam a ni bawk. Hei bakah hian sikul naupang ruihhlo lo khawih tawhte chu hnawtchhuak tawp lo va, an mamawh tak tanpuina an dawn theihna turin school counsellor neih ni se tih a ni a. Counsellor atan Social Work emaw Psychology lama thiamna nei ngei chauh neih ni se tiin rawtna siam a ni. 

Policy-in din a tum pakhat, Anti-Drug Club chu Hnahthial District-ah a awm sa thu tarlan niin thawm chak a nih theihna turin mahni zirlaipuite zirtirtu tur, Master Volunteer thlan chhuah a, training pek ni se ti a rel nghal a ni.

Hei bakah hian Policy duan mek chhunga awm tam tak sawi ho niin khawtlang hruaitute leh Department hrang hrangte mawhphurna sawi ho a ni a. District hrang hrang atanga rawtna siamte hi Draft policy tih changtlun zawkna tur atan hman a ni ang.

Thutkhawmnaah hian Dy. DPC, Samagra Shiksha; District Child Protection Officer, Child Development Project Officer, Sub-Divisional Education Officer, District Information & Public Relations Officer leh Department hrang hrang aiawhte an kal a, VC, MJA leh NGO aiawhte an kal bawk a ni.