4005/2024-2025

Dated Hnahthial, the 29th January, 2025: Vawiin khan Hnahthial DC Meeting Hall-ah District Election Officer (DEO) leh District Bawrhsap ni bawk, Pi Rita Lalnunmawii Pachuau kaihhruaiin Village Council Inthlanpui, 2025 lo awm tur atana Press Briefing chu neih a ni a. Hnahthial District chhunga Mizoram Journalist Association (MJA) member-te he hunah hian an kalkhawm a ni.

District Election Officer chuan Mizoram chu ziak leh chhiar thiam kan tam ang huin vote thlak kan tlem thin chu thil ngaihmawhawm tak a nih thu a sawi a. Indian ram hi mipuite lalna ram, democracy a nihna angin kan hruaitu turte thlan theihna tur atana dikna chanvo kan neih chu kum kan tlin huna Electoral Roll a kan hming a chuan hi a ni a ti a. Chumi dikna chanvo kan neih rual chuan a ken tel, India khua leh tui kan nihna anga kan tih makmawh chu vote thlak hi a nih thu sawiin kan dikna chanvo kan hriat viau rual hian mipuite hian duh aiin kan mawhphurhna hi kan hlen tha lo thin a ni a ti a. Vote tur ka hre lo tih hi mi puitlinglo zia anih thu sawiin vote nei tawh chu thlak theuh tura a duh thu a sawi a. Vote thlak an tam theih nan theihtawpa awareness lo nei a, hma lo la turin he huna thuthar lakhawmtu kalkhawmte chu a sawm a ni.

DEO chuan inthlan ni a buaina a chhuah loh nan leh vote chhiar huna dik leh felfai taka chhiar a nih theih nan counting hall tinah P&E lampang nen tangrualin light fit vek tura hma an lak mek thu a sawi bawk.

Electoral Registration Officer (ERO) leh Addl. DC ni bawk, Pu Zothanmawia Khiangte chuan Model Code of Conduct Nodal officer a nihna angin press mite chu MCC palzut an awm leh awm loh venpuitu pawimawh tak an nih thu a sawi a. Hei bakah hian inthlan nikhuaah buaina siam thei zawnga thu belhchian dawl lo chhuah hi a awm thin thu sawiin chutiang boruak chhia a awm loh nan thuthar lakhawmtute chu venpui turin sawm bawk a ni.

Election Officer, Pi Esther Leihang chuan tun inthlanpui lo awm tur atana hriat tur tul zualte chu sawiin press mite chuan silent period, February ni 10, tlai dar 4 atanga February ni 12, tlai dar 4 thlenga neih tur chu tha taka zawm a nih theih nan thawhpuiah a sawm a. Heng niah te hian aurinna chang ni lo, whatsapp leh social media hmun dangah te pawh inthlan kaihhnawih campaign reng reng a awm loh nan venpui turin a sawm bawk a ni.

Zawhna leh chhanna hun neih nghal niin chumi zawh chuan briefing hi tihtawp a ni.

Thutkhawmnaah hian Pu HD Lalpekmawia, Project Director, DRDO; Pu R. Vanlalruata, SDC leh Pu F. Lalrinfela, DIPRO te chu an tel a ni.