4004/2024-2025

Dated Kolasib the 29 January 2025: Vawiin khan Economics & Statistics Department buatsaihin Kolasib District huamchhunga Registrar of Births & Deaths zawng zawng te’n, Govt. Kolasib College Auditorium-ah Registration of Birth and Death Annual Meeting cum Training an nei.

He Registration of Birth and Death Annual Training-ah hian Deputy Commissioner Pu Robert C. Lalhmangaiha Chu khuallian niin Pu Zoremmuana Ralte, Kolasib DRO chuan Training a kaihruai a. Directorate of Economics & Statistics atangin Pu Vanlalfinga, Inspector leh Pu J. Ramdinmawia, Inspector te Resource Person niin Training hi an pe a ni.

Khuallian, Deputy Commissioner Pu Robert C. Lalhmangaiha  chuan Economic and Statistics Department  in vawiin hun an buatsaih chu a lawmawm a tih thu sawiin Registrar of Birth and Death kalkhawmte chu chibai a buk a. Kolasib District a Resigtration of Birth and Death khaikhawmtu Kolasib DRO office in a an hnathawh te leh Bullettin an tih chhuah thin leh nitina naupiang leh mithi zah an tarlang thin chu an chhuanawm a takzet a ni, a ti.

DC chuan vawiina kalkhawmte chu an pawimawhna in hre nawn turin a chah a. Mizoramah Certificate lem avanga harsatna an tawh thin thu te sawiin Birth leh Death certificate issue tu annih angin dik leh fel taka hna an thawh chu mizoram himna a ni a, sawrkar inrelbawlna fel takin a kal phah a ni, a ti. Mizoram leilung fa diktak te certificate a an chuan theih nan tan la zual sauh turin a chah bawk a ni.

He Registration of Birth and Death Meeting cum Training-ah hian, Registration of Birth and Death kum 20 thawk tawhte chawimawina thuziak Pu Daniela Ralte, Meidum leh Pu K. Lalbiakmawia, Serkhan hnenah hlan an ni a. Pu K. Lalbiakthanga, DRO kalchhuak ta leh Pu Vanlalhawla Bairabi PHC RBD te sunna neih niin, anmahni hriatrengna thuziak an chhungte hlan a ni bawk. 

Mizoram pumpuiah hian Births & Deaths Registration Unit 884 a awm a, heng zingah 116 te hi Damdawiin behchhan (Institution) niin, a dang zawng 768 te hi Veng/ Khua pual (Local) te an ni. Unit tinah hian Registrar of Births & Deaths (RBD), Sawrkar hnathawk mi pakhat zel an awm a . Kolasib District huam chhungah hian Damdawiin Behchhan RBD 8 leh Veng/ Khua behchhan RBD 37 a awm a ni.

Births & Death Registration hi, Damdawiin behchhana kan neih mek RBD 116 te hian nikum November 11, 2024 atang khan Online Registration kalpuiin – Piang leh thi te hnenah Digitized Certificate zel an pe chhuak thei tawh a. Hetiang ang hian Veng/ khua tana RBD 768 kan neihte hian February 1,2025 atanga Online Registration ti a, Digitized Certificate zel pe chhuak thei turin Training hi neih a ni.