1956/2025-2026

Dated Hnahthial, the 2nd September, 2025: Vawiin khan Hnahthial DC Meeting Hall-ah Hnahthial District AIDS Prevention & Control Committee chu an chairman leh Bawrhsap ni bawk, Pi K. Vanlalruati kaihhruaiin an thukhawm a. Meeting chuan HIV/AIDS dona leh a darh zel tur ven nana Hnahthial District chhung khaw hrang hrangah Intensified IEC Campaign neih nise tiin a rel.

Meeting chuan Intensified Information, Education and Communication (IEC) Campaign chu Hnahthial District chhunga neih dan tur relin tun thla September ni 11 hian DC Conference Hall-ah hawnna hun buatsaih tura rel a ni a. Mizoram State AIDS Control Society (MSACS), Hnahthial District thawktute chuan September ni 16 atangin Hnahthial District chhung khaw hrang hrang fangin hetah hian Intensified IEC Campaign hi an nei chhunzawm ang a, he hunah hian a thlawn a HIV Test, HIV awareness campaign bakah ruihhlo chungchang awareness campaign an nei nghal ang.

He hunah hian Chief Medical Officer, Medical Superintendent, Addl. SP, District Education Officer, Officer in Charge Excise & Narcotics, District Programme Officer, Women & Child Development Department leh Project Manager, Hoi Philoi Hnahthial te an tel a ni.