709/2026-2027

Dated Hnahthial, the 26th May, 2026:

Vawiin khan Hnahthial DC Meeting Hall-ah Bawrhsap, Pi K. Vanlalruati chuan RGSA scheme atangin Village Council pali - Leite, New Kawnpui, Lungleng South leh Aithur te hnenah computer set pakhat theuh a sem a. District Local Administration Officer (DLAO), Pu HD Lalpekmawia chuan semna hun hi kaihruaiin computer set chu sawrkar laipui scheme - Rashtriya Gram Swaraj Abhiyan (RGSA) atanga sem a nih angin VC tinte chu mimal tan ni lova khawtlang tana hmang ngei turin a chah a ni. 

Bawrhsap chuan sawrkarin khawtlang hruaitute chu a duhsak avangin theih ang anga thuam that a tum thu a sawi a. Tun tum computer set dawng VC-te chu a lawmpui rualin computer chu thil chhe awlsam leh enkawl uluk ngai a nih avangin VC tinte chu a enkawltu tur bik ruat a, a khawih thiamte chauh khawihtir turin a chah a. Power supply tel lo chuan a tangkai tur anga a tangkai loh avangin backup nei tha tura chahin mimal tan ni lova khawtlang tana hmang theuh turin a chah nghal a ni. 

DLAO leh DRDO ni bawk, Pu HD Lalpekmawia chuan vawiin a computer set an sem chu uluk taka enkawl a, tangkai taka hmang turin VC-te chu a chah a. Vawiin atangin District Panchayat Resource Centre (DPRC) ah DLAO anga hnathawh tan a nih tur thu sawiin khawtlang hruaitute'n inrelbawlna tha zawk an neih theih nan theihtawp an chhuah dawn a ni a ti a. DRDO hna chelh lai a nih angin LAD bakah RD hnuaia hmalakna leh hna hrang hrang awmte tha taka kalpui a nih zel theih nan khawtlang hruaitute chu thawhpuiah a sawm nghal a ni.