42/2025-2026

Dated Hnahthial, the 3rd April, 2025: Vawiin khan Hnahthial District Bawrhsap, Pi K.Vanlalruati chuan Hnahthial by-pass road siam mek chu Addl SP, DIPRO leh JE(PWD) te bakah Mathiyan Construction Pvt Ltd, ABCI, NHIDCL, YMA leh MJA aiawh te hovin endikna a nei a. Mathiyan Construction Pvt Ltd te chuan an intiam ang ngeiin tun April thla ral hma hian by-pass road chu an zawh fel hman tur thu an sawi a ni.

Mathiyan Construction Pvt Ltd aiawh, Tej Bahadur Tomar, Construction Manager chuan Aizawl kawng atanga kal a, Hnahthial by-pass road luh tawntirh kawng chhak chu breast wall a dawl a nih tur thu leh a sak hna chu ni 15 hnuah an tan tur thu a sawi a. Chumi hma chuan breast wall bul by-pass kawng chu peih fel vek a nih tur thu a sawi bawk.

By-pass kawng atanga Denglung pen luhna kawng chu duhthu a sam lo ni a thudawn a nih avangin Bawrhsap ho chuan endik nghal a ni a. Mathiyan lam chuan by-pass road siam hna an zawh hnuah Denlung pen luhna kawng chu luh a nawm zawk theih nan an siamthat tur thu an sawi.

By-pass kawng chhaka NH-54 kawng tla bal, dawl that hna thawh mek chu endik bawk niin RCC Retaining wall siam hna bik chu zawh fel a ni tawh thu tarlan a ni a. Retaining wall hi metre sarih (7m) vela sang niin Mathiyan lam chuan an sawi a. NH-54 kawngpui an a la thlen phak lohna chu leia dawla, thing to theihna tura siam (seeding and mulching) tum a ni. 

Bawrhsap chuan kawng tla bal lai chu zauh a, Retaining wall pawh kawngpui an thlenga dawl chhoh ni thei se a duh thu a sawi a. Mathiyan lampang chuan an General Manager chu naktuka a rawn kal tur thu leh chumi hunah chuan ruahmanna an lo ennawn tur thu an sawi a ni.

Tun dinhmunah hian by-pass road black top (Dense Bituminous Macadam) loh hi belhkhawmin metre za sarih (700m) vel a la awm thu tarlan a ni a. A bak zawng hi chu black top vek tawh niin layer tawpna (Bituminous Concrete) phah chauh an hmabak tawh a ni. By-pass road thui zawng hian 7km a tling lo hret a ni.

Kawngpui siam mek hi a chawh rualin metre sarih (7m) a zau a ni a. Tej Bahadur Tomar, Construction Manager chuan an hna thawh chakloh chhan ber pakhat chu kawngpui siamna hmanrua (raw materials) duhthusam a tam a awm loh vang a nih thu a sawi a. Kawngpui siamna tur rora hi Haulawng road atanga an lak deuh vek a nih thu a tarlang bawk. Tun dinhmunah chuan hnathawktu (workers) 70 vel an awm thu a tarlang a ni.

NHIDCL hnuaiah Mathiyan ho hian by-pass road hnathawh hi changin NH-54 hi ABCI lamin an chang thung a. By-pass kawng hi siam zawh a nih hnuah Mathiyan Construction Pvt Ltd chuan kum li (4years) chhung an enkawl ang.