41/2024-2025

AIZAWL; the 3^rd April, 2025: Vawiin April ni 3, 2025 (Ningani) chawhma dar 10:00 khan HCL Tech Bee Job Fairs/Sensitization Programme chu kum 2024 a Class 12 pass tawhte leh Class 12 result nghak mekte tan Mizoram Youth Commission chuan Govt. Mizo High School Examination Hall-ah a buatsaih.

He HCL Tech Bee Job Fair/Sensitization Programme-ah hian HCL Tech Bee Company hnuaia a Class 12 pass thar hlimte tana hnathawk paha lehkhazir chhunzawm zel theih dan te, HCL Tech company a zirlaite tana hamthatna awm thei chi hrang hrangte inkawhhmuhna leh sawihona hun neih a ni. HCL Tech Bee hnuaiah hian MBSE hnuaia Class 12 pass, 60% mark hmu chin an inziak lut thei a, an in register hnuah anmahni enfiahna kawng 4 paltlang tur a awm a. Chumi an paltlang hnu chuan zirlaite chu HCL Tech Bee hnuaiah hian Training an nei ang. Training hi thla 12 chhung a ni dawn a, Training chhung a fee chawi ngaite chu Mizoram Youth Commission chuan engemawzat a tumsak ang. An training zawhah HCL Company ah duh chuan an thawk chhunzawm thei ang. Lehkha an zir chhunzawm zel duh anih pawhin company lam hian engemawzat an zirna senso an tum sak dawn a ni.

He programme-ah hian kum 2024 a Class 12 pass tawh leh result nghaklai mi 42 an tel thei a ni. He Job Fair/Sensitization programme hi Pi Lalramdini, Under Secretary, MYC chuan a kaihruai a, Pu C. Labiakzauva, District Education Officer, School Education Department chu trainer niin, Dr Vanrammawia, Associate Professor, H&TE Department Aizawl District chu Discussion programme kaihhruaitu a ni a. HCL Tech official te hnen atangin thusawi ngaihthlak a ni bawk. HCL Tech Bee Job Fair hi Mizoram District 5 thlanchhuah ah neih tur a ni a, Aizawl district ah hian a bul tanna hun hman a ni.