2956/2023-2024

Hnahthial the 6th December 2023: District Sericulture Office, Hnahthial buatsaihin vawiin khan DSO Training Hall, Rallang Tlang, Hnahthial-ah ‘Sericulture Farmer’s Annual Meet, 2023 & Advance Christmas’ hman a ni a, he hun hi District Bawrhsap Pu Chuauhnuna chuan Khuallian niin a hmanpui.

District Bawrhsap Pu Chuauhnuna chuan silk farmers (pangang khawitu) kalkhawmte chu chibai a buk a, a taka hna thawktute hmel hmuh chu lawmawm a tih thu sawiin hetiang hun duhawm tak hman theih a nih chhan chu department hotute vang a nih rualin Sawrkar scheme hlawhtlinna reng reng chu a taka thawktu farmers te an ni, a ti. Khuallian Pu Chuauhnuna chuan Silk Samagra-2 Scheme-ah Hnahthial District chu Mizoram pumah beneficiaries tlem ber ni si a titha ber an ni thei chu chhuanawm a tih thu a sawi a, thawktute inpekna leh tumruhna rah a ni tiin tang zual sauh turin a fuih a, department hotute leh farmers-te pawh thahnemngai taka thawk chhunzawm zel turin a fuih bawk. Mizo thalaite chu kuthnathawh uar zual tura a duh thu a sawi a, dik leh fel taka sum lakluh rah chu a thlum bik a, kuttlinglo sum lakluh chu a tawpah manganna thlentu mai a ni a ti bawk. Kalkhawm nu leh pa te pawh an fate theuhah kuthnathawh hlutna tuh zual zel turin a chah a, an mahni fuih phur a, kaihruaitu ni theuh se tiin Hnahthial district chuan hmasawnna rahbi thar a kai chhoh zel a beisei thu a sawi bawk. District Bawrhsap chuan kalkhawmte chu sericulture department hotute thlazar hnuaiah tun aia hlawhtlinna tha zawk an chan ngei a rin thu sawiin duhsakna a hlan nghal bawk a ni.

Vawiin hun hi Pu R Vanlalhruaia, Sericulture Inspector chuan a kaihruai a, Pi Rosy Lallawmzuali Fanai, DSO Hnahthial in welcome speech sawiin Pu R Lalthlamuana, Leite in hunserh a hmang a ni. Vawiin Sericulture Farmer’s Annual Meet & Advance Christmas-ah hian kumin chhunga Hnahthial District a cocoon thar hnem ber leh pangang pakhat tui atanga coccon quality tha ber tehfunga hmangin titha lawmman sem a ni a, lawmman dawngtute chu:

1) Pi Nunhlanzovi (Rotlang E)-28.3 kg cocoon
2) Pu H Lalsangzuala (Rotlang E)-26.2 kg cocoon
3) Pu Lalhlimpuia (Rotlang E)-21.72kg cocoon te an ni.

Anni bakah hian department in pangang tui a sem apianga thahnemngai taka khawi thin hnehah special prize hlan bawk niin Pi Rochamliani (Khawhri) in he lawmman hi a dawng bawk.

Vawiin hun hi session 2 a then niin chawhnu session ah Pu Lalzarzova Chhangte, Cocoon Purchasing Centre neitu in thusawina a nei a, Samuel Lalpekkima Sailo, Village circle In charge in report pein Pi Rosy Lallawmzuali Fanai, DSO chuan Eri Cocoon khehdan demonstration a nei a, Pu R Lalsawma, Sericulture Demonstrator in lawmthu sawiin hun tawp a khar a ni.