2957/2023-2024

Champhai the 6th December, 2023 – Sawrkar Laipui Ministry of Information & Broadcasting sum cheng nuai 100 senga ‘Experiential Learning Centre (ELC)’ Champhaia din tur chungchang ngaihtuahin vawiin khan ELC Management Committee te chu an Chairman Champhai DC Pu James Lalrinchhana kaihhruaiin Champhai DC Conference Hall, Keifangtlangah an thukhawm. Champhai ELC hi Mizorama ‘Experiential Learning Centre (ELC)’ hmasa ber tur a ni.

He hunah hian ELC Management Committee Chairman Champhai DC Pu James Lalrinchhana chuan ELC chungchang sawizauna hun a hmang a. ‘Experiential Learning Centre (ELC)’in a tum ber chu naupangte leh thalaite tana technology thil thar hrang hrang an inzir theihna tur hmun ruahmana, hmanraw hrang hrang chhawpchhuah sak a ni a. He ELC ah hian Augmented Reality, Virtual Reality leh Metaverse khawl hrang hrangte dah a ni dawn a. Sawrkar Laipui Ministry of Information & Broadcasting sum cheng nuai 100 senga ruahman tur a ni a, 100% Central funding niin, State Sawrkar in he project atan hian insen ve a ngai lova. A enkawl chhunzawm na leh, khawl repair leh thawktute hlawh te chu amaha intum thei tura beisei a ni thung a ni. He ELC din na tur hian tun dinhmunah sanction tih fel tawh niin cheng nuai 50 dawn tawh a ni a, hnathawh pawh tan nghal tum niin January tha chhungin hawn hman beisei a ni.

ELC Management Committee Chairman Champhai DC Pu James Lalrinchhana chuan tunlai khawvel changkang chho zelah information technology lama hmasawnna hrang hrangte thangtharten an inzir ve zel a tul thu sawiin, ELC chu Champhai District-a zirna ti hmasawn tu hmanraw pawimawh tak ala nih ngei a rin thu a sawi a. Zirlaite ah Science and Technology leh information technology lama tuina leh thiamna a thlen ngei a beisei thu a sawi bawk. ‘Experiential Learning Centre (ELC)’ Champhai District-a din anih theihna tur hian tum tam tak Sawrkar Laipui Ministry of Information & Broadcasting hotute a dawr thu pawh sawiin, he project tih hlawhtlin theihna tura kawng engkima lo kaihruaia lo ngaihven tu Pu Armstrong Pame, IAS, Director, Ministry of Information & Broadcasting, Government of India chungah lawmthu a sawi bawk a ni.

ELC Management Committee thukhawm chuan Champhai District ‘Experiential Learning Centre’ din na hmun atan CHANEM Building, 2nd Floor chu a hmunah en hovin, lungrual takin an pawm a. UD&PA Engineer-te enkawlna hnuaiah a chhung chei hna hi thawh tan nghal tur a ni a, 1152 square feet a zau a ni dawn a, Augmented Reality, Virtual Reality leh Metaverse khawl hrang hrangte dah a ni dawn a ni.

ELC Management Committee Champhai District ah hian DC Office-a Officerste, UD&PA, School Education, I&PR, NIC officials-te telin, Sub Hqrs YMA leh MHIP hruaitute an tel bawk a ni.