2947/2023-2024

Hnahthial the 5th December 2023: Vawiin khan Hnahthial-ah District Bawrhsap Pu Chuauhnuna hovin Krismas leh Kumthar vuakveta boruak muanawm tak a awm theih nan dan leh thupek kenkawh chungchangah khawtlang hruaitute nen DC Meeting room, DC Office-ah an thukhawm.

He thutkhawmah hian District Bawrhsap Pu Chuauhnuna chuan Krismas leh kumthar hlim leh thlamuang taka mipui mimir ten an hman theuh theih nan leh a vuakveta dan leh thupek tha taka kenkawh a nih theih nan meeting kumtin neih thin a nih thu tarlangin kuminah pawh State level-ah chuan Chief Secretary hovin neih a lo nih tawh thu a sawi a ni. District Bawrhsap chuan Hnahthial-ah pawh heng hal puah, hal mawi leh silai mu nei thlengin khapna thupek chhuah a nih tawh thu a tarlang a, chumi thupek bawhzuina kawngah dan kengkawhtute chu theihtawpa tan lakpui turin a sawm nghal bawk a ni.

He hunah hian Krismas leh kumthar vuakveta boruak muanawm tak a awm theih nan tul leh pawimawhte sawiho niin Addl SP Pu Albert Lalnunpuia pawhin an inpuahchahnate a tarlang a, buaina liantham a thlen loh a beisei thu a sawi bawk.Khawtlang hruaitu aiawhte pawhin kum hmasa lama an hmalak tawhnate leh boruak thalo awm palh thei laka inven dan tur tha leh tul dangte sawiin hun hlawk thlak tak hman ho a ni.

Vawiin meeting-ah hian District Bawrhsap Pu Chuauhnuna bakah Addl DC Pu Lalvenhima, Addl SP Pu. Albert Lalnunpuia, EO/BDO Pu Lalbiakfela leh VC, MUP, HKJC aiawhte a tel a ni.