No.3772/2021-2022

Aizawl the 22nd January, 2022 : Hnahthial District Bawrhsap Pu R.Lalremsanga chuan vawiin khan Aithur leh Khawhri tlawhin VC leh NGO hruaitute kawmin khawtlang tih hmasawnna kawngah thawh hona tha tak nei tura fuihin Covid-19 hrileng dona kawngah sorkar hmalakna te tha taka tawiawm tlat turin a chah bawk a ni.

 

Vanhnuaithanga Run, Aithur a khawtlang hruaitute nen inkawmhona an neihah Hnahthial District Bawrhsap Pu R.Lalremsanga chuan Aithur khuaa kum 18 chunglam za-ah za (100%) ten Covid-19 Vaccine an la vek leh kum 15 -18 inkar ten first dose an la vek leh tun thlenga Covid- 19 hri kai an la awm lo chu lawmawm a tih thu sawiin Ramngaw leh Nungcha humhalhna kawnga an hmalakna pawh fakawm a tih thu leh theihtawp chhuah zel turin a chah a, "Ramngaw kan humhalh that hi kan nitin mamawh Tui hna kan siamna ni nghal a, khaw tam tak tui harsat chhan hi ngaw kan vah chereu nasat vang a ni a, ngaw kan tih chereu hian keimahni tan harsatna kan siam tihna a ni a, humhalh tlat hi kan tih tur a ni" tiin Aithur khua Tui lakna Solar pumping chu a hmunah a tlawh bawk a ni. Chenna In 41 awmna khua Aithur hian ramngaw Tin 100 hmun vel zet an humhalh mek a ni.

 

Khawhri khuaah pawh Myanmar buaina avanga raltlan awm mek te chu District Bawrhsap Pu R.Lalremsanga chuan tlawhin harsatna an neih leh neih loh te zawtfiahin a tul ang zelin an mamawh phuhruk tum a nih thu hrilhin Mutbu (Blanket) thahnem tak leh Damdawi a pe a ni.

 

Khawhri VC leh VLTF hruaitute nena inkawm hona an neihah District Bawrhsawp chuan Hnahthial District chu hun rei tak a inchiah hnuah kum 2019 atangin a takin kalpui tan a ni a, thil inthlak thleng hunah ah a awm mek tih sawiin "Covid-19 hrileng avangin khawvel hmun dang ang bawkin kan state pawh kan buai a, engkawng pawh zawh dawn ila hrisel phawt a ngaih avangin sum pawh nasa takin a kal a ni. Hmasawnna hi vawi khatah a kal pur pur thei lova, sorkarin hma ala chho zel a, hmasawnna hmel thar kan la hmu chho zel ang" tiin khawtlang mamawh hrang hrang an thlente chu a theih ang anga ngaihtuah sak a tum thu a sawi.

 

Chenna In 90 vel awmna khawhri khuaah hian Kum 18 chunglam za-ah za (100%) ten Covid-19 vaccine la tawhin kum 15-18 inkar te pawh pek kalpui mek a ni. Covid-19 hrileng dona kawngah leh Faina chungchang Khawhri khua hmalakna chu Hnahthial District Bawrhsap Pu R.Lalremsanga chuan lawmawm a tih thu sawiin Hnahthial District ti hmingthatu an nih angin theihtawp chhuah chhunzawm zel turin a chah bawk a ni.

Attachment

  • Loading attachment...