1935/2026-2027

Dated Hnahthial, the 25^th August, 2026: Hnahthial District Bawrhsap pisa tualzawlah vawiin chhun khan DC Office, DSWO leh ALIMCO-te buatsaihin District chhunga rualbanlo leh tar chak lo zawkte tana siam, anmahni tanpuina hmanrua chu semchhuah a ni a. He hunah hian Bawrhsap, Pi K. Vanlalruati chu khuallian niin Addl DC, Pu Zothanmawia Khiangte chuan hun a kaihruai a ni. 

Bawrhsap chuan pianphunga harsatna neih chu kan duh vang reng a nih loh thu sawiin chumi a nih rual chuan rilru harhvang tak pu chungin midang aia indahhniam tum loh tur a nih thu a sawi a. Sawrkar chuan rualbanlo leh tar chak lo zawkte chu a ngaihsak thu sawiin midang ang tho va nun an hman ve theihna turin zirna tha leh an hmanraw mamawh ang angte chu pek thin an nih thu a sawi bawk. Tunlai khawvelah chuan rualbanlote pawh en hran an nih tawh loh thu sawiin heng hmanrua an sem takte chu a dawngtute nuna hmasawnna thlentu a nih ngei theihna turin duhsakna a hlan a ni. 

Bawrhsap chuan Village Council hruaitute chu anmahni khaw chhunga hetiang hmanrua mamawhte lo bengvar a, huntiam chhunga an dil ve hman ngei theihna tura hma la turin a chah a. A dawng thei leh thei lo tur endikna, Assessment camp neih thinte chu ngai pawimawh thin turin a chah bawk. 

He hunah hian Hnahthial District chhunga tanpuina dawng turte hnenah hmanrua hi semchhuah nghal niin Pu CL Joseph, DSWO chuan semna program hi a kaihruai a, Bawrhsap, Pi K. Vanlalruati; DIPRO, Pu F. Lalrinfela te leh Pu Dipti Ranjan, Prosthetics & Orthotics Officer, ALIMCO PMDK , Aizawl te chuan hmanrua hi an semchhuak a ni.

Hnahthial District-ah hian ADIP hnuaiah tanpuina dawng mi panga (5) awmin hmanrua sawm leh pahnih (12) semchhuah a ni a; RVY hnuaiah hian tanpuina dawng mi za leh sawmthum pathum (133) an awm bawk. A vaiin hmanrua hi mi za leh swmthum pariat (138) hmenah semchhuah niin nikum November thla Assement Camp atanga thlanchhuahte an ni. 

Artificial Limbs Manufacturing Corporation of India (ALIMCO) chungchang sawi zau na hi Pu Zorinsanga, EDP cum Accountant, ALIMCO PMDK, Aizawl hnen atanga ngaihnathlak a ni a. ALIMCO hi Ministry of Social Justice & Empowerment hnuaia awm niin Scheme pahnih - Rualbanlo te tanpuina, ADIP (Assistance to Disabled Persons) leh Tar chak lo zawkte tanpuina, RVY (Rashtriya Vayoshri Yojana) chu an kalpui thin a. Vawiin khan hmanrua hrang hrang - wheelchair, knee brace, spine support, walking stick, silicone cushion leh adangte semchhuakin a diltute dil leh mamawh ang zela semchhuah a ni. 

ADIP scheme hi rualbanlo card (UDID) neite tan dil theih niin RVY scheme hi kum 60 pel tawhte tana dil theih a ni ve thung.