No.5590/2020-2021

Hnahthial District chhunga Police Officer te chuan Superintendent of Police Pu Lalbiakkila hovin vawiin khan SP Office Training Hall-ah Crime Review meeting neiin Ni 1st Jan. - Sept.2020 chhunga hmalakna te an thlir ho a ni.

Pu Lalbiakkila SP Hnahthial chuan Police tha ni turin FIR bawhzui that a pawimawh thu sawiin "Police-ah hian Case investigation aia hna lian leh pawimawh a awm thei lova, FIR rawn lut kan bawhzui dan leh kan chhui chhuah leh chhuah loh hi mipuite hian min tehna a ni fo a ni. Building tha pui pui leh hmanraw changkang tak tak nei mah ila FIR kan bawhzui that loh chuan Police tha kan ni thei ngai lovang" tiin miin FIR an thehluh chuan rang taka bawhzui thin tur leh Complainant te hriat tur ang chi pawh hrilh hre thin turin a chah bakah thil pawi thlenna hmun hma te chu mipui ten Police thlen hmaa an tih chhiat loh a tul thu a sawi bawk.

"Police Officer-te hian thuneihna sang tak nei mah ila kan hman thiam loh hi a hlauhawm hle a ni" tiin Hnahthial SP chuan "IPC leh CrPC te hi keimahni a bet tlat a ni tih hre rengin kan hre bel tur a ni. Dan hre lo tan a huaisen theih loh avangin investigator tha ni turin dan kan hriat a ngai a, kan chhiar tam a tul a ni" a ti. Police Station leh Outpost-a O/C te chu an Jurisdiction hre chiang tura chahin Hnahthial SP chuan "Mipui himna tura thawk kan nih angin VC leh NGO te nen thawhhona tha tak kan neih a tulin kan thawhchhan mipuite rintlaka kan awm hi a pawimawh hle a, chu chu kan chakna pakhat tur pawh a ni" a ti.

Covid-19 hrileng chuan Police-te pawh a tih buai nasat thu sawiin Pu Lalbiakkila chuan "tun hmaa kan thawh thin piah lamah Covid-19 do tura kan penchhuah a ngaiin kan District chhunga Myanmar nen inrina hrang hrangah kan Police te an duty a, chungah chuan hming hliauna leh mipui atanga complain engmah vawiin thlenga kan dawng lo hi a lawmawm takzet a ni" tiin lawmthu a sawi bakah Covid dona kawnga dan bawhchhia an man te sum chawi tling khawm chu Rs.88,200/- a nih tawh thu a sawi bawk a ni.

Crime Review Meeting-ah hian tarlan danin kumin January Ni 1 atanga vawiin thlengin Hnahthial District chhungah Case 21 ziahluh a nih tawh a, heng zinga Case 5 chu Charge sheet ni tawhin 1 chu FR a ni a, Case dang 15 te chu pending an la ni. Heng bakah Unnatural death 7 a awm tawh bawk.