No.5589/2020-2021

Veterinary, Fishery and Sericulture Board Vice Chairman leh Aizawl North III Bialtu MLA ni bawk, Pu C. Lalmuanpuia chuan Union Public Service Commission buatsaih National Defence Academy & Naval Academy (NDA & NA) Examination tling thar, Chanmari West-a cheng Dayne Thiamsangliana chu lawmpuina a office chamber-ah vawiin khan a hlan.

Pu C. Lalmuanpuia chuan thu sawiin a bial chhung atanga UPSC buatsaih NDA & NA examination-a inziaktling awm chu thinlung takin lawmawm a ti a, sipai officer ni turin hmabak thui leh khirh tak awm zel dawn mah se, a hautak lai leh rahbi pawimawh, Dayne Thiamsangliana hian a kai tawh a ni, a ti a. India ram pum exam tling 662 zingah a tel thei hi a chhuanawm em em a, a kal zelna turah duhsakna a hlan a, India sipai officer tha tak ni turin a hlawhtling ngei ang tih a ring bawk a. Tunlai khawvela thalaite hun tawn mekah chawimawi phu leh ngaihsan phu a ni, a ti a. Hun enge maw lai atangin Central Civil Services leh UPSC Exam hrang hrangah Mizote kan tlem tak avangin, mipuiin Mizo tam zawk lut thei se an duh em em a, sorkarin thalaite fuih phur tumin hma lakna a kalpui mek a, tlawmngai pawl liam ber YMA rorel inkhawm pawhin Central Civil Services leh UPSC Exam hrang hrangah Mizo tam zawk an luh theih nan hma lak ni rawh se, tiin thu an lo titlu tawh bawk a, ram leh hnam tan thil pawimawh a ni tih chiang takin a hriat theih a ni, tiin a sawi. Mizo zirlaiten Central Service hrang hranga luh hi a pawimawhna te, a hlutna te, ram leh hnam nghawng a nihnate hre thar zel ila, Dayne Thiamsangliana hlawhtlinna tawn mek atang hian kan nih ve theih, kan chanvo atana ruat a ni tih chiang zawkin hria ila, nih ve duhna tak tak nen nasa lehzualin bei tlang turin thalai te a fuih a ni.

MLA Pu C.Lalmuanpuia hian Dayne Thiamsangliana lawmpui leh chawimawi nan Rs. 50,000/- a hlan a ni.

UPSC buatsaih NDA & NA exam hi sipai officer ni thei tura kawlkawng pawimawh a ni a, Class 12 leh a tlukpui zo ten an exam thei a ni. NDA & NA Exam-a tlingte hian National Defence Academy-ah sipar officer ni thei turin kum thum chhung zirna an chhunzawm ang a, chumi hnuah an zawm tur ber- Army, Navy emaw Air Force huang chhungah kum khat an zir chhunzawm leh dawn a ni. Kum 4 an zir zawha Army an nih chuan Lieutenant atangin an tan ang a, Navy-ah Sub-lieutenant leh Air Force-ah flying officer atangin hna an tan ang. An inzir chhungin sorkar in stipend Rs 21,000/- a pe ang a, an inzir chhung hian nupui neih phal a ni lo.