558/2023-2024

Hnahthial the 24th May, 2023 - Hnahthial District Development Coordination & Monitoring Committee chu an chairman Pu C. Lalrosanga, MP, Lok Sabha kaihhruaiin vawiin khan Govt Hnahthial College Conference Hall-ah thukhawmin Hnahthial District huamchhunga sawrkar laipui sum hmanga hmalakna leh hnathawh hrangte an thlir ho a, Line Department ten harsatna an neih te thlenin hmalak tul te ngaihtuah ho a ni.

Meeting kaihruaitu Pu C.Lalrosanga, MP (LS) chuan DISHA meeting chu chu Central Government scheme pawimawh zawng zawng thlirhona leh zirchianna anih avangin Sawrkar Laipuiin a ngaih pawimawh takzet thu a sawi a. Hnahthial District chuan hma a sawn chak hlein a hriat thu sawiin Pu C.Lalrosanga, MP (LS) chuan "hmasawnna tur ruahmanna tam tak te pawh a awm a, sum lamah harsatna intawk te pawhin ka ringa theihtawp chhuah tlang zel tur kan ni" tiin hmun hrang hrang a kal kualna ah Sawrkar Laipui Scheme hrang hrangte chu thingtlang mipui ten an chhawr tangkaiin hmasawn nan an hmanpui thu a sawi a, "Mizoram hian kan hmang tha tlangpuiin lawmman dawng pha pawh an awm nual a ni" tiin Sawrkar Laipui chuan 'Digital India' tiin Digitization a kalpui nasat thu leh khawvelah hian a hmangtu tam lam atanga chhutin hmahruaitu ni hialin a lan thu a sawi a, hemi kawngah hian Sawrkar Department hotute intuaihriamin Staff te training tir ngaih pawimawh a tul thu leh mipuite pawh kawhhmuh a ngaih thu a sawi bawk a ni.

Hnahthial District chhunga Sawrkar Laipui ruahmanna hnuaia hmalakna leh hnathawh hrang hrang thlirna-ah hian Line Department aiawh te chuan an hmalakna hrang hrang sawifiahin PMAY (Urban) hnuaia tanpuina sum chu hmuh mek zel a nih thu a sawi a. Hnahthial District-ah Kum 2022 - 2023 chhungin IMR leh MMR an awm lo chu lawmawm tih thu sawiin DISHA meeting neih tawhna District hrang hrangah 'Nil' awmchhun ala nih thu a sawi a, thawktute chu tan la chhunzawm zel turin a ngen bakah NGO lam aiawh ten Hnahthial Damdawi In a Gynecologist la awm loh avanga harsatna awm an tarlan chu bawhzui a tum thu a sawi bakah Social Welfare Department hnuaia National Benefit Scheme kalpui chu mipuite hrilh hriatna kawngah tan la thar turin thawktute a ngen nghal bawk a ni.

He hunah hian Hnahthial District Bawrhsap Pu R.Lalremsanga chuan kalkhawmte lawmna thu sawiin Hnahthial District dinhmun thenkhat a tarlang bawk a ni.

Meeting ah hian Central sawrkar sum hmanga hmasawnna hnathawh hrang hrangte report pek ani a; a tlangpui chu hetiang hi a ni.

Tun dinhmunah Hnahthial District-ah MGNREGS job card holder 6895 awm mekin, kum 2022-23 chhungin ni 100 inhlawhna siam a ni. 3th & 4th Quarter 2022-23 chhungin MGNREGS Wage Component hnuaiah hna chi hrang hrang (check dam, terrace, rural connectivity, farm pond, roadside plantation etc) hna 393 thawhniin Wage Component hnuaiah hna 50 thawh a ni. Mi harsa te insak tanpuina scheme PMAY (G) hnuaiah beneficiary 206 awmin chhungkaw 144 te hnenah first instalment pek tawh an ni. Border Area Development Program (BADP) hnuaiah hna 5 - Ngharchhip to Rawnalzawl kawng, Thlanmual to Recreation Centre kawng Bualpui H, Extension of PHC Building with Installation of Auto-Analyser ( Bio-Chem ) at PHC, S Vanlaiphai, Muallianpui Middle School Building sak, S Chawngtui playground sak hna te thawh mek a ni.

Kum upa pension IGNOAPS hnuaiah Hnahthial Districtah beneficiary 288 an awm mek a, widow pension scheme hnuaiah beneficiary 88 awm mekin, pianphung rualbanlo beneficiary 36 an awm mek bawk. ICDS hnuaiah Hnahthial District ah Anganwadi 115 awm mekin beneficiary 5578 an awm a ni. Eklavya Model Residential School (EMRS),Hnahthial District din tur pawhin hmalakna chak taka kal mek zelin tun dinhmunah a ram tihfel tawh niin a building sak tan thuai tum a ni.

BPL chhungkua te tana a thlawn gas connection Pradhan Mantri Ujjwala Yojana(PMUY) ah beneficiary 175 awm mekin AAY hnuaiah Card 663 leh PHH hnuaiah Card 2697 a awm mek a ni.

Hnahthial District huamchhunga NH-54 Upgradation hna kal mek chainage 125.00 Km to 208.000( Pkg-03 & Pkg-04) ah hna za zela 68 zawh tawh niin NHIDCL te chuan an report a. Package 3 hnuaia kawng siam 40.20kms a thui hi 19.01.2024 ah zawhfel hman an tum thu leh Package 4 hnuaia kawng siam 42.53 kms a thui hi 21.10.2023 ah zawhfel hman an tum thu an report bawk.

Heng scheme te bakah hian National Health Mission, Jal Jeevan Mission, Samagra Shiksha, MzSRLM etc chungchang te sawiho niin hmalaknaa harsatna tawh thin te, ruahmanna hmachhawp te leh thil dang pawimawh tam tak sawi ho a ni.