559/2023-2024

Khawzawl, the 24th May, 2023: Samagra Shiksha, Khawzawl District leh Mizoram Science Teachers Association (MSTA) bultumin Sensitization Workshop on Children's Science Congress 2023 chu vawiin chawhnu dar 1:00 khan Khawzawl Vengthar YMA Hall-ah buatsaih a ni a, he hunah hian Khawzawl District chhunga High School leh Middle School a Headmaster leh Science Teacher-te an tel a, an vaiin mi 103 an tel thei a ni.

Vawiin Workshop hi Pu K.Thantluanga, Dy. DPC, Samagra Shiksha, Khawzawl chuan kaihruaiin, he hun hmanpuitu DPC leh DEO ni bawk Pu Lalsikula chuan Children's Science Congress-ah Khawzawl District-in result tha tak a lo neih tawh thin thu sawiin, hei hi zirna lama kan hmasawnna pholangtu pakhat a nih avangin School hrang hrangte pawhin kan ngaih pawimawh a tul a ni a ti a. Samagra Shiksha, Khawzawl District leh Mizoram Science Teachers Association bultuma Sensitization Workshop buatsaih chuan hmasawnna a thlen ngei a beisei tih sawiin, Workshop-a telte pawh tha taka ngaithla a, hlawkna neihpui ngei turin duhsakna a hlan a ni.

Workshop-ah hian Resource Person Dr. Laldinpuia, Associate Professor, Centre for Disaster Management, Mizoram University-in Children's Science Congress buatsaih a nih chhante sawifiahin, Power Point Presentation hmangin hemi atana inbuatsaihna neih dan tur leh Science Congress-a tel zirlaite an inpuahchah dan turte kimchang takin a sawi a, zawhna leh chhanna hunte an hmang ho bawk a ni.

Vawiin Workshop-ah hian District Coordinator, CSC Pu Jehova Jire-a'n Children's Science Congress 2022 Khawzawl District-a buatsaih dante tarlangin District aiawh thlan chhuahte leh an project neihte a tarlang a. Khawzawl District pian hnuah hian Children's Science Congress hi vawi 4 buatsaih a ni tawh a, State Level-ah District aiawhte tirh thin an ni.