560/2023-2024

Kolasib dated 24th May 2023: Vawiin chawhma khan Bairabi North YMA Hall-ah Bairabi Higher Secondary School Managing Board ruahmanna in Higher Secondary School Leaving Certificate Examination 2023-a Bairabi Higher Secondary School zirlai hlawhtlingte lawmpuina hun buatsaih a ni a. Minister Pu K.Lalrinliana, Kolasib Assembly Constituency bialtu MLA chuan khuallian niin a hmanpui a, Bairabi khawtlang hruaitute leh Bairabi khaw chhung a school hrang hrang zirlaite he hun ah hian an tel a ni.

Minister Pu K.Lalrinliana chuan Bairabi Higher Secondary School Managing Board-te hmalakna a School din tirh atanga HSSLC Exam result ah kum tin hmasawnna hmuh tur a awm chu Managing Board member, zirtirtu leh zirlaite fakawm a tih thu a sawi a, beidawnna chu hlawhchhamna thlentu a nih angin exam beitute zinga hlawhtlinna chang ve lo te pawh beiseina lian zawk nei chung a tan nasa lehzual a la turin a fuih bawk a ni. HSSLC exam paltlangte chuan zirna in sang zawk zawh tura an inbuatsaihna kawngah tum mumal tak nei tura an rilru siam fel hmasak a pawimawh thu Minister chuan sawiin thiamna hmantlak, khawtlang leh ram tan a chhawrtlak thiamna neih a tul thu a sawi.

Kan State thenawm a zohnahthlak unauten harsatna an tawh mek avangin Mizoramah raltlan thahnem tak an awm thu Pu K.Lalrinliana chuan sawiin unau inkar a induhsakna leh inpumkhatna lantirna chuan hnam zahawm leh ropuiah min siam theih thu a sawi. Mizoram leilung hausakna haichhuah a nih theih nan mithiam mamawhna a san thu leh chutiang mithiam chherchhuah a nih theih nan tun a zirtirtute leh zirlaite hi an pawimawh thu Minister chuan sawiin khawtlang, ram leh hnam tan a mi tangkai leh kan ram intodelhna tur a engemaw tal thawhtu ni turin zirlaite chu a chah bawk a ni.

Pi K.Lalsiamliani, District Education Officer chuan zirlai exam hlawhtlingte chu a lawmpui thu sawiin tunlai khawvel a eizawnna dapna kawng a hlawhtlinna chang tur chuan midangte aia taimak chhuah a, thiamna tak tak neih tum a tan lak a pawimawh thu a sawi a. Zirna hmangin thiamthil hrang hrang chharchhuak a, chung thiamthil hmang a eizawnna rintlak haichhuah kawngah pawh tan lak a tul thu a sawi. Zirna chu hmasawnna thlentu a nih angin Bairabi khawtlang tihhmasawn lehzual nan neitu nihna thinlungpu chung a School chu khawtlangin an vilpui leh an enkawlpui a pawimawh thu Pi K.Lalsiamliani chuan sawiin zirna ngaihsanna hmun apiangah hmasawnna a kal chak thin thu a sawi.

Pu R.Lalrinawma, Vice Chairman, Bairabi HSS Managing Board pawhin zirlaite fuihna thu sawiin Bairabi khua tih hmasawnna tur a Sawrkarin zirna in leh infiamna khelmual changtlung tak a siamte chu a tak a hmang tangkaitu ni turin zirlai kalkhawmte a chah.

Bairabi Higher Secondary School result lawmna hun hi Pu R.Lalfakawma, Chairman, Bairabi HSS Managing Board in a kaihruai a, Pu Jonathan Zaithanchhunga, Principal, Bairabi HSS chuan zirlai pass dan dinhmun tarlanna hun neiin zirlaite atangin zai leh lamte entir a ni.

Kum 2023 Higher Secondary School Leaving Certificate Exam-ah hian Bairabi HSS atanga zirlai za zel a 97 te chuan hlawhtlinna changin Distinction ah 2, 1st Division ah 13, 2nd Division ah 7 leh 3rd Division ah zirlai 7 an pass a ni. Zirlai exam pass te hi Minister Pu K.Lalrinliana chuan lawmpuina thilpek a hlan vek a, Bairabi HSS Managing Board leh Bairabi Higher Secondary School hnen ah thilpek a hlan bawk a ni.